“Valideynlərin təhsil prosesində fəal iştirakı şagirdlərin dərsə marağını və motivasiyasını əhəmiyyətli dərəcədə artırır.”
Bu sözləri “Tehsil365”ə açıqlamasında ibtidai sinif müəllimi,pedaqoq Validə Quliyeva bildirib.
Müəllim qeyd edib ki, uşaqların təhsilində yalnız məktəbin deyil, ailənin də mühüm rolu var. Onun sözlərinə görə, valideynlərin övladlarının dərsləri ilə maraqlanması, onların gündəlik fəaliyyətlərini izləməsi və dəstək göstərməsi şagirdlərin məsuliyyət hissini gücləndirir.
“Valideyn dəstəyi hiss edən şagirdlər dərslərə daha həvəslə yanaşır və tapşırıqları yerinə yetirərkən özlərini daha inamlı hiss edirlər. Bu isə onların həm akademik nəticələrinə, həm də ümumi inkişafına müsbət təsir göstərir,” — deyə o vurğulayıb.
Validə Quliyeva bildirib ki, bəzi hallarda valideynlərin təhsil prosesinə laqeyd yanaşması uşaqlarda motivasiya azalmasına səbəb olur. Onun sözlərinə görə, uşaqlar valideynlərinin diqqətini və dəstəyini hiss etdikdə təhsilə daha ciddi yanaşırlar.
“Valideynlərin uşaqların dərs prosesi ilə maraqlanması, onların nailiyyətlərini qiymətləndirməsi və çətinliklər zamanı dəstək olması çox vacibdir,” — deyə müəllim qeyd edib.
Müəllim hesab edir ki, məktəb və valideyn əməkdaşlığı gücləndirildiyi zaman şagirdlərin inkişafı daha müsbət istiqamətdə gedir.
“Uşağın uğurlu gələcəyi üçün müəllim və valideyn eyni məqsəd uğrunda birlikdə çalışmalıdır,” — deyə Validə Quliyeva əlavə edib.