Martın 10-da Bakı Konqres Mərkəzində Dövlət Proqramı İdarəetmə Qrupunun təşkilatçılığı, Azərbaycan Gənclər Fondu və Azərbaycan Tələbə Gənclər Təşkilatları İttifaqının tərəfdaşlığı ilə “Təhsilinlə fərqlən: Qlobal təcrübə, milli dəyər” adlı tədbir keçirilib.
“Tehsil365” xəbər verir ki, tədbir Dövlət Proqramının təqdim etdiyi imkanlar, proqrama müraciət qaydaları və seçim meyarları barədə gənclərin məlumatlandırılmasına həsr olunub. Sessiyada Dövlət Proqramı məzunları da öz təcrübələrini iştirakçılarla bölüşüblər.
Tədbirdə çıxış edən Dövlət Proqramı İdarəetmə Qrupunun layihə rəhbəri Qədir Xəlilov bildirib ki, xaricdə təhsil üzrə dövlət siyasətinin əsası ümummilli lider Heydər Əliyev tərəfindən qoyulub və bu siyasət bu gün də uğurla davam etdirilir. Onun sözlərinə görə, proqramın ilk mərhələsi 2009–2015-ci illəri əhatə edib, hazırda isə 2019–2028-ci illər üzrə “Xaricdə təhsil üzrə Dövlət Proqramı” icra olunur. Q. Xəlilov vurğulayıb ki, Prezident İlham Əliyevin həyata keçirdiyi “neft kapitalının insan kapitalına çevrilməsi” siyasəti çərçivəsində gənclərin xaricdə nüfuzlu universitetlərdə təhsil alması üçün geniş imkanlar yaradılıb.
Milli Məclisin deputatı Ceyhun Məmmədov çıxışında Azərbaycanda təhsilə dövlət səviyyəsində böyük diqqət göstərildiyini bildirib. O qeyd edib ki, son illər yeni ali təhsil müəssisələrinin yaradılması, mövcud universitetlərin infrastrukturunun yenilənməsi və beynəlxalq əməkdaşlığın genişləndirilməsi bu siyasətin tərkib hissəsidir. Deputat əlavə edib ki, ADA University, Azərbaycan-Fransız Universiteti (UFAZ) və Azərbaycan-İtaliya Universiteti kimi layihələr ölkənin ali təhsil sisteminin inkişafında mühüm rol oynayır. Onun sözlərinə görə, gənclərin xaricdə təhsil alması üçün yaradılan imkanlar böyük fürsət olmaqla yanaşı, həm də ciddi məsuliyyət tələb edir.
Azərbaycan Gənclər Fondunun icraçı direktoru Ceyhun Hüseynov isə çıxışında qeyd edib ki, azərbaycanlı gənclərin xaricdə təhsil alması ənənəsi hələ sovet dövründən mövcuddur və müstəqillik dövründə də bu siyasət davam etdirilib. O xatırladıb ki, Prezident İlham Əliyevin 16 aprel 2007-ci il tarixli Sərəncamı ilə 2007–2015-ci illəri əhatə edən “Xaricdə təhsil üzrə Dövlət Proqramı” təsis olunub və minlərlə gəncin nüfuzlu universitetlərdə təhsil almasına şərait yaradılıb. C.Hüseynov əlavə edib ki, xaricdə təhsil almaq gənclərin bilik və dünyagörüşünün formalaşmasında mühüm rol oynayır və onların ölkənin inkişafına töhfə verməsinə imkan yaradır.
Azərbaycan Tələbə Gənclər Təşkilatları İttifaqının sədri Rəşad Zeynalov isə bildirib ki, dövlət tərəfindən gənclərin xaricdə keyfiyyətli təhsil alması üçün yaradılan imkanlar böyük etimad və məsuliyyət deməkdir. Onun sözlərinə görə, gənclər əldə etdikləri bilik və təcrübəni Azərbaycana gətirərək ölkənin inkişafına töhfə verməlidirlər. R.Zeynalov qeyd edib ki, Dövlət Proqramını qazanmaq ciddi hazırlıq və yüksək bilik tələb edir.
Tədbirin əsas məqsədi prioritet ixtisas sahələri üzrə istedadlı və potensiallı gənclərin proqramda iştirakını təşviq etmək və bu imkanları daha geniş auditoriyaya çatdırmaq olub.
Qeyd edək ki, 2026–2027-ci tədris ili üzrə Dövlət Proqramına müraciət aprelin 15-də açıq elan olunacaq. Təsdiq olunmuş yeni siyahıya əsasən, namizədlərə 15 prioritet ixtisas istiqaməti üzrə dünyanın 33 ölkəsini təmsil edən 231 nüfuzlu ali təhsil müəssisəsində tədris olunan ümumilikdə 4121 proqram üzrə təhsil almaq imkanı yaradılıb. Bu ildən proqram çərçivəsində “Mədəniyyət və incəsənət” sahəsi üzrə də imkanlar genişləndirilib.
Məlumata görə, “2022–2028-ci illər üçün Dövlət Proqramı” çərçivəsində indiyədək 413 nəfər bakalavriat, 1362 nəfər magistratura, 19 nəfər isə doktorantura səviyyəsi üzrə olmaqla ümumilikdə 1794 nəfər Dövlət Proqramı qalibi adını qazanıb.