Martın 10-da Mətbuat Şurasında ehtiyatda olan polkovnik-leytenant, Əməkdar müəllim Bayram Məmmədovun 70 illik yubileyi qeyd edilib
“Tehsil365" xəbər verir ki, Mətbuat Şurasının sədri Rəşad Məcid yubilyarı təbrik edib, Bayram Məmmədovun jurnalist fəaliyyətindən, məqalələrinin müxtəlif qəzetlərdə dərc edilməsindən danışıb.
Milli Məclisin deputatı Səbinə Xasayeva çıxışında bildirib ki, Bayram Məmmədov yazılarında milli-mənəvi dəyərlərimizi təbliğ edib, yüksək vətəndaşlıq mövqeyi sərgiləyib.
YAP Zəngilan rayon təşkilatının sədri Natiq Quluzadə, tarix üzrə fəlsəfə doktoru, ehtiyatda olan polkovnik Lətif Şüküroğlu çıxışlarında, Bayram Məmmədovun Birinci Qarabağ müharibəsində erməni işğalçılarına qarşı döyüşlərdə iştirakını xatırladaraq, onun Müdafiə Nazirliyini Hərbi Akademiyasında fəaliyyətindən və “İngiliscə-Azərbaycanca, Azərbaycanca-ingiliscə lüğət” tərtib etməsindən danışıblar.
Türk Ağsaqqalları Arasında Əlaqələrin İnkişafı İctimai Birliyinin (TAİBİ) İdarə Heyətinin sədr müavini Eyvaz Hümbətov və digərləri Bayram Məmmədovun azərbaycançılıq ideallarına sevgisindən, fəaliyyətini bu amil əsasında qurmasından, türkdilli xalqlar arasında mənəvi əlaqələrin daha da möhkəmləndirilməsi istiqamətində fəaliyyətindən bəhs ediblər.