Bakı Dövlət Universitetinin (BDU) Biologiya fakültəsinin Tələbə Elmi Cəmiyyətinin (TEC) təşkilatçılığı ilə 27 Mart - Elm Gününə həsr edilmiş tədbirlər çərçivəsində Türkiyənin Hacettepe Universitetinin professoru, zooloq və entomoloq Ali Demirsoyun “Qlobal istiləşmə” mövzusunda onlayn elmi seminarı keçirilib.
Universitetdən “Təhsil365”ə bildirilib ki, məruzədə professor Ali Demirsoy qlobal istiləşmənin ekosistemlərə təsirini elmi-statistik məlumatlar əsasında təhlil edib. O vurğulayıb ki, atmosferdə istixana qazlarının konsentrasiyasının artması biosferdə balansın pozulmasına gətirib çıxarır. Qeyd olunub ki, temperatur artımı nəticəsində bioloji müxtəliflik üçün həyati əhəmiyyət daşıyan təbii arealların dəyişməsi müşahidə olunur, bəzi növlərin yayılma arealı daralır, bəziləri isə yeni ərazilərə miqrasiya edir. Bu proses xüsusilə həşərat faunasına təsir göstərərək kənd təsərrüfatı bitkiləri üçün zərərverici növlərin sayında artım riskini yüksəldir. Bildirilib ki, iqlim dəyişiklikləri ilə əlaqədar ekosistemlərdə baş verən bu cür transformasiyalar uzunmüddətli perspektivdə qida təhlükəsizliyi, su ehtiyatlarının qorunması və biomüxtəlifliyin davamlılığı baxımından ciddi çağırışlar yaradır.
Qlobal iqlim dəyişikliyinin Azərbaycan üçün doğurduğu spesifik risklərdən söz açan professor xüsusilə ölkəmizdə su ehtiyatlarının azalması, Xəzər dənizinin səviyyəsinin aşağı düşməsi və kənd təsərrüfatındakı quraqlıq problemlərinə diqqət çəkib. Ekoloji böhranın təsirlərini azaltmaq üçün operativ şəkildə “yaşıl enerji” layihələrinə keçidi sürətləndirməyin və su idarəçiliyində müasir texnologiyalarının tətbiqinə yönəlməyin vacibliyini vurğulayıb.
Elmi seminarda iqlim dəyişikliyi ilə mübarizədə Türkiyə təcrübəsinə də toxunulub. Professor Ali Demirsoy bildirib ki, Türkiyədə iqlim dəyişikliklərinin təsirlərinin azaldılması məqsədilə son illərdə elmi-tədqiqat mərkəzləri, universitetlər və dövlət qurumları arasında koordinasiyalı fəaliyyət genişləndirilib. Bu istiqamətdə iqlim modelləşdirilməsi, biomüxtəlifliyin monitorinqi və su ehtiyatlarının səmərəli idarə olunması üzrə bir sıra elmi layihələr həyata keçirilir. Xüsusilə quraqlıq riskinin yüksək olduğu regionlarda suyun təkrar istifadəsi, damcı suvarma texnologiyalarının tətbiqi və alternativ enerji mənbələrinin inkişafı prioritet istiqamətlər kimi müəyyənləşdirilib. Bu təcrübə regional əməkdaşlıq çərçivəsində Azərbaycan üçün də faydalı model kimi qiymətləndirilə bilər