Yaz fəslinin başlanması ilə havanın temperaturunda və rütubətində dəyişikliklər baş verir. Həmin dəyişikliklər bəzi mövsümi xəstəliklərin aktivləşməsinə səbəb ola bilər. Xüsusilə mart ayında havanın tez-tez dəyişməsi immun sisteminə təsir göstərir və müəyyən xəstəliklərin artmasına şərait yaradır.
“Tehsil365“ AZƏRTAC-a istinadən xəbər verir ki,bunu açıqlamasında Səhiyyə Nazirliyinin mütəxəssis-eksperti, terapevt Nahid Məhərrəmov deyib.
Mütəxəssis bildirib ki, yaz aylarında daha çox rast gəlinən mövsümi xəstəliklər arasında respirator virus infeksiyaları, allergik xəstəliklər və bəzi bakterial infeksiyalar yer alır: “Soyuq havadan nisbətən isti havaya keçid dövründə kəskin respirator infeksiyalar və qrip halları hələ də müşahidə oluna bilər. Eyni zamanda, yaz mövsümündə bitkilərin tozcuqlarının (polenlərin) artması ilə əlaqədar allergik rinit, göz allergiyaları və bronxial astma kimi allergik xəstəliklər də daha çox qeydə alınır”.
Nahid Məhərrəmov diqqətə çatdırıb ki, mart ayında havanın dəyişkən olması səbəbindən sağlamlığı qorumaq üçün bir neçə vacib qaydaya əməl etmək tövsiyə olunur. “İlk növbədə, hava şəraitinə uyğun geyinmək və temperatur dəyişiklikləri ilə bağlı diqqətli olmaq lazımdır. Günün isti saatlarına aldanaraq nazik geyinmək düzgün deyil, çünki səhər və axşam saatlarında hava daha sərin olur və bu da xəstələnmə riskini artırır. Bundan əlavə, immun sistemini gücləndirmək üçün balanslı qidalanmaq, vitamin və minerallarla zəngin qidalar qəbul etmək vacibdir. Meyvə və tərəvəzlərin, eləcə də kifayət qədər mayenin qəbul edilməsi orqanizmin müqavimətini artırır. Gigiyena qaydalarına riayət etmək, əlləri tez-tez yumaq və xəstə insanlarla yaxın təmasdan çəkinmək respirator infeksiyalardan qorunmağa kömək edir. Allergiyaya meyilli şəxslər isə xüsusilə diqqətli olmalıdırlar. Açıq havada uzun müddət qalmaqdan çəkinmək, yaşayış məkanlarını mütəmadi havalandırmaq və zərurət olduqda həkim məsləhəti almaq tövsiyə olunur", - deyə o vurğulayıb.