"ABŞ-nin İran və Venesuelaya qarşı əməliyyatlarda süni intellektdən istifadə etməsi "Terminator" filminə bənzər texnologiya fəlakətinin gerçəkləşmə riskini artırır".
“Tehsil365“ TASS agentliyinə istinadən xəbər verir ki, bu bəyanatla Çin Xalq Respublikasının Müdafiə Nazirliyinin rəsmisi Çjan Bin açıqlama verib.
O qeyd edib ki, hərbi sahədə süni intellektin nəzarətsiz tətbiqi, insanların həyat və ölüm qərarının alqoritmlərə həvalə edilməsi yalnız hərbi münaqişələrdəki əxlaqi və məsuliyyət qaydalarının pozulmasına deyil, eyni zamanda texnoloji böhrana, eləcə də "Terminator"dakı qorxunc ssenarinin həyata keçməsinə səbəb ola bilər".
Nümayəndə rəsmi Pekinin süni intellekt sistemlərindən hərbi məqsədlərlə limitsiz şəkildə istifadə edilməsinə qətiyyətlə etiraz bildirdiyini xüsusi vurğulayıb.
Daha öncə "The Washington Post" nəşri öz mənbələrinə əsaslanaraq məlumat yaymışdı ki, ABŞ yüzlərlə hədəfi müəyyənləşdirmək, onların koordinatlarını dəqiqləşdirmək və ardıcıllığını tərtib etmək üçün "Claude AI" modelinin bazasında işləyən "Maven Smart System" rəqəmsal platformasını tətbiq edir. Bu texnologiyanın köməyi ilə Birləşmiş Ştatların ordusu əməliyyatın başlandığı ilk 24 saat ərzində minədək hədəfə zərbə endirib. Hücumlardan sonra sözügedən sistem əldə olunan nəticələri analiz edir. Nəşrə danışan mənbələrdən biri bildirib ki, süni intellekt hərbi qüvvələrə döyüş fəaliyyətlərinin sürətini əhəmiyyətli dərəcədə artırmağa şərait yaradıb.
Çjan Binin xatırlatdığı 1984-cü ildə lentə alınmış elmi-fantastik döyüş kinosu bəşəriyyətə düşmən kimi təqdim olunan süni intellektin tarixi gedişatı dəyişmək məqsədilə kiborq androidi keçmiş zamana yollayaraq insanlara qarşı apardığı müharibəni özündə əks etdirir.