AMEA Memarlıq və İncəsənət İnstitutunun elmi işçisi, Memarlar İttifaqının üzvü, Beynəlxalq Memarlıq Akademiyasının müxbir üzvü Zərnaz İmanzadənin “İslamın müqəddəs mərkəzi - şəhərsalma və memarlıq” kitabı işıq üzü görüb.
İnstitutdan “Təhsil365”ə bildirilib ki, kitab Məkkənin memarlıq və şəhərsalma sənətini, həmçinin müqəddəs məkanlar olan Kəbə və Məscid əl-Haramın memarlıq-planlaşdırma, kompozisiya və bədii xüsusiyyətlərini tarixi perspektivdən araşdıran ilk tədqiqatlardan biridir.
Kitab oxucunu bu müqəddəs yerlərin uzaq keçmişini və indiki zamanda olan mövcud durumunu kəşf etməyə dəvət edir.
Böyük İslam sivilizasiyasının mənşəyinə, inkişaf yollarına və adət-ənənələrinə marağın getdikcə artdığı, İslamın və onun müqəddəs məkanlarının yalnız müsəlmanların deyil, digər mənəvi ənənələrin nümayəndələrinin də diqqətini cəlb etdiyi bir dövrdə yazılmış bu kitab həm elmi-təcrübi, həm də ideoloji baxımdan əhəmiyyət kəsb edir.
Kitab memarlıq tarixinin tədrisində, dinşünaslıq fakultələri üçün isə İslam tarixinin öyrənilməsi üçün dərs vəsaiti kimi istifadə oluna və dünya memarlıq tarixi barədə əsərlərin yazılmasında qiymətli mənbə və sənəd kimi xidmət edə bilər.
Sözügedən nəşr Şərqin müsəlman ölkələrinin memarlıq və şəhərsalma sənəti tarixinə, həmçinin müasir memarlığına aid əsərlərin yazılması zamanı faydalı ola bilər.
Azərbaycanda Həcc və Ümrə ziyarətinə gedənlərin sayının ildən-ilə artdığı bir şəraitdə kitab zəvvarlar üçün İslamın Məkkə, Mina, Müzdəlifə, Ərəfət kimi ecazkar yerləri, həmçinin görkəmli müqəddəs abidələri olan Kəəbə və Məscid əl-Haram haqqında dəyərli məlumat mənbəyidir.
Bu kitabla tanışlıq oxucuya İslam ənənəvi mədəni dəyərlərini də anlamağa kömək edəcək.