Azərbaycan Xalq Cümhuriyyətinin (AXC) süqutundan sonra mühacir həyatı yaşamağa məcbur olan görkəmli ictimai-siyasi xadimlərə dövlətimizin göstərdiyi diqqətin təzahürü olaraq, AXC Parlamentinin deputatı, Azərbaycan Milli Şurasının üzvü Abbasqulu Kazımzadənin Türkiyənin paytaxtı Ankarada Cəbəci Asri Məzarlığında yerləşən məzarı bu ölkədəki səfirliyimiz tərəfindən əsaslı təmir edilib.
“Tehsil365" xəbər verir ki, təmir zamanı məzarın orijinal görkəmi və ölçüləri qorunmaqla başdaşı və plitələri eyni materialdan olan andezit daşlarla yenilənib. Əvvəlki başdaşının üzərində yer alan və şair Namiq Kamalın “Ölürsem görmeden millette ümid ettiğim feyzi. Yazılsın sengi kabrime Vatan mahzun, ben mahzun” misraları yenidən yazılıb.
Qeyd edək ki, Abbasqulu Kazımzadə AXC-nin süqutundan bir müddət sonra İstanbula köçmək məcburiyyətində qalıb. 1938-ci ildə Türkiyəni tərk edən Abbasqulu Kazımzadə 1942-ci ildə yenidən bu ölkəyə qayıdıb və 1947-ci il iyulun 28-də Ankarada mühacirətdə vəfat edib.