Şagirdlərdə oxuma və araşdırma vərdişlərinin formalaşması üçün müəllim və valideynlərin birgə fəaliyyəti vacibdir. Texnologiyadan düzgün istifadə, birgə kitab müzakirələri və motivasiyaedici üsullar bu prosesdə mühüm rol oynayır.
Təhsil eksperti Elçin Süleymanov “Tehsil365”ə verdiyi açıqlamada bildirib ki, şagirdlərdə oxuma və araşdırma vərdişlərinin inkişaf etdirilməsi üçün həm məktəb, həm də ailə mühüm rol oynayır. Onun sözlərinə görə, müasir dövrdə texnologiyadan düzgün istifadə etməklə uşaqlarda bu istiqamətdə maraq yaratmaq mümkündür və vizual vasitələr bu prosesə müsbət təsir göstərir.
Ekspert qeyd edib ki, dərsdənkənar tapşırıqların verilməsi və müəllimlərin təşəbbüsləri şagirdlərin araşdırma bacarıqlarının inkişafına kömək edir. Eyni zamanda valideynlər də uşaqlarının kompüter və mobil telefon qarşısında keçirdikləri vaxtı nəzarətdə saxlamalı, xüsusilə oyunlara həddindən artıq aludəçiliyin qarşısını almaq üçün müəyyən addımlar atmalıdırlar.
Onun sözlərinə görə, valideynlər uşaqları ilə daha çox vaxt keçirməli, onlarla birgə maraqlı fəaliyyətlər və əyləncələr təşkil etməlidirlər. Bu cür fəaliyyətlər uşaqlarda texnologiyaya həddindən artıq bağlılığın azalmasına kömək edə bilər. Bununla yanaşı, şagirdlərə oxuma və araşdırma ilə bağlı aylıq və ya həftəlik hədəflər qoymaq və əldə edilən nəticələri mükafatlandırmaq da motivasiyanı artırır.
Elçin Süleymanov bildirib ki, oxunan kitabların ailə daxilində müzakirə edilməsi, uşaqlara bayram və xüsusi günlərdə kitab hədiyyə edilməsi, eləcə də ailə üzvləri ilə birgə “kitab oxuma saatları”nın təşkili mütaliə vərdişlərinin formalaşmasına müsbət təsir göstərir.
Ekspert əlavə edib ki, müəllimlərin qrup işləri, birgə araşdırma layihələri və müxtəlif mənbələrin toplanması ilə bağlı tapşırıqlar verməsi də şagirdlərin araşdırma bacarıqlarının inkişafına əhəmiyyətli töhfə verir.