Təhsil eksperti Qoşqar Məhərrəmov ali təhsil müəssisələrində nəzəri biliklə praktikanın balansı məsələsinə münasibət bildirib.
“Tehsil365”ə açıqlamasında o qeyd edib ki, ali təhsil sistemində nəzəri və praktiki dərslər arasında balans düzgün qurulmalıdır. Onun fikrincə, tədrisin təxminən 30 faizi nəzəri, 70 faizi isə praktiki olmalıdır.
“Bizdə isə praktikaya çox az yer verilir. Ona görə də düşünürəm ki, ali təhsil sistemi yenidən islah edilməli və yenidən qurulmalıdır. Hazırkı vəziyyətdə tələbələr əmək bazarının ehtiyac duyduğu sahə biliklərini lazımi səviyyədə öyrənə bilmirlər”, – deyə ekspert bildirib.
Onun sözlərinə görə, bəzi hallarda tələbələr əsasən nəzəri biliklər əldə edir və bu biliklərin bir qismi artıq internetdə və müxtəlif onlayn təhsil platformalarında asanlıqla əlçatandır.
Ekspert qeyd edib ki, ali təhsil müəssisələrində tələbələrin praktiki bacarıqlarının inkişafına daha çox diqqət yetirilməlidir. Bunun üçün universitetlərlə müxtəlif şirkətlər, sənaye və xidmət müəssisələri arasında əməkdaşlıq gücləndirilməlidir.
“Laboratoriyalar genişləndirilməli, simulyasiya otaqları yaradılmalı və biznes, sənaye və xidmət müəssisələri ilə sıx əlaqələr qurulmalıdır. Universitetlərlə şirkətlər arasında yaxın münasibətlər olarsa, tələbələr təhsil prosesi zamanı birbaşa praktiki bacarıqlar əldə edə bilərlər”, – deyə o əlavə edib.
Ekspert vurğulayıb ki, əks halda tələbələr universiteti bitirdikdən sonra əmək bazarının ehtiyac duymadığı biliklərlə məzun olur və nəticədə iş tapmaqda çətinlik çəkirlər.