Onun sözlərinə görə, tələbələr, abituriyentlər və valideynlər bu məsələni dəqiqləşdirmək üçün Təhsildə Keyfiyyətin Təminatı Agentliyinin rəsmi internet səhifəsinə müraciət etməlidirlər.
Təhsil eksperti Ramin Nurəliyev “Tehsil365 “ə verdiyi açıqlamada diplomların tanınması ilə bağlı mövcud vəziyyəti şərh edib.
“Diplomların tanınmaması məsələsini əlbəttə ki, tələbələr, abituriyentlər və yaxud da valideynlər agentliyin rəsmi internet səhifəsinə girərək öyrənə bilərlər. Orada diplomları tanınan universitetlərin, yaxud da diplomlarında hər hansı bir problem yaşanan universitetlərin siyahısı var. Həmin siyahıya baxıb dəqiqləşdirmək mümkündür,” – deyə Ramin Nurəliyev bildirib.
Ekspertin sözlərinə görə, bəzi xaricdə təhsil şirkətləri valideynlərin saflığından istifadə edərək onları yanlış yönləndirir: “Çox təəssüflər olsun ki, hal-hazırda bəzi xaricdə təhsil şirkətləri valideynlərin saflığından istifadə edərək bəzi məqamları demədən onları aldadırlar. Məsələn, Ukraynaya qəbul məsələsində konkret olaraq Ukraynada distant təhsilin forması bizdə tanınmadığı üçün diplom aldıqdan sonra da o diplom tanınmayacaq. Bunu bir mənalı olaraq bilməlidirlər. Ancaq bəzi şirkətlər deyirlər ki, narahat olmayın, oxusun, gətirərsiniz, mən diplomu 4 il sonra tanıtdıraram. Bu, tamamilə yalandır. Valideyn və tələbə 4 il sonra nə o adamı, nə də o şirkəti tapa bilməyəcək.”
Ramin Nurəliyev əlavə edib ki, distant təhsil forması Azərbaycanda mövcud olmadığı üçün ekvivalenti də yoxdur və bu səbəbdən diplomlar tanınmır. “Bundan əlavə, Türkiyədə açıq öyrətim – bizdəki adı ilə qiyabi təhsil – var. Onun diplomu da bizdə tanınmır, çünki ekvivalenti yoxdur. Valideynlər bu məsələlərə xüsusilə diqqət yetirməlidirlər. Daha sonra Gürcüstanda, Dərbənddə, Dağıstanda bəzi universitetlərin filialları var və həmin filialların diplomları da bizdə tanınmır,” – deyə ekspert vurğulayıb.
O, valideynlərə və tələbələrə tövsiyə edib ki, ən çox etibar edilən ali təhsil müəssisələri dövlət proqramında adı keçən universitetlərdir: “Bir mənalı olaraq ən çox tövsiyə olunan xarici ali təhsil müəssisələri dövlət proqramında adı keçənlərdir. Həmin universitetlərdə təhsil alan gənclərin diplomları tanınır və heç bir problemlə qarşılaşmırlar.”