Məktəblərdə şagirdlər arasında zorakılıq və ya bullinq halları uşaqların psixoloji vəziyyətinə ciddi təsir göstərə bilər. Mütəxəssislər bildirirlər ki, belə hallar yalnız qısa müddətli deyil, uzunmüddətli psixoloji problemlərə də səbəb ola bilər.
Mövzu ilə bağlı psixoloq “Tehsil365"ə açıqlama verib.
Psixoloqun sözlərinə görə, bullinqə məruz qalan uşaqlarda ilk növbədə özünə inamsızlıq və qorxu hissi yaranır: “Uşaq davamlı şəkildə təzyiq və təhqirlə qarşılaşdıqda özünü dəyərsiz hiss etməyə başlayır və sosial mühitdən uzaqlaşa bilər.”
Mütəxəssis qeyd edib ki, bu cür vəziyyətlər uşağın akademik fəaliyyətinə də təsir edir: “Bullinqə məruz qalan şagirdlərdə dərsə marağın azalması, diqqət problemləri və məktəbə getmək istəməmək kimi hallar müşahidə oluna bilər.”
Psixoloq vurğulayıb ki, belə halların qarşısının alınması üçün məktəb və ailə əməkdaşlığı vacibdir: “Valideynlər və müəllimlər uşağın davranışında dəyişiklikləri diqqətlə izləməli və problem yarandıqda vaxtında müdaxilə etməlidirlər.”