Uşağın erkən inkişafında məktəbəqədər təhsil mühüm rol oynayır. Bu səbəbdən valideynlər üçün bağça seçimi olduqca məsuliyyətli qərarlardan biri hesab olunur. Mütəxəssislər bildirirlər ki, düzgün seçilmiş məktəbəqədər təhsil müəssisəsi uşağın sosial, emosional və intellektual inkişafına müsbət təsir göstərir.
Mövzu ilə bağlı məktəbəqədər təhsil üzrə ekspert Töhfə Mustafayeva “Tehsil365"ə açıqlama verib.
Ekspertin sözlərinə görə, valideynlər bağça seçərkən ilk növbədə müəssisənin təhlükəsizlik və gigiyena şəraitinə diqqət etməlidirlər: “Uşaqların sağlam və təhlükəsiz mühitdə olması əsas şərtdir. Bağçanın fiziki şəraiti, otaqların təmizliyi və təhlükəsizlik qaydalarının qorunması mütləq nəzərə alınmalıdır.”
Mütəxəssis qeyd edib ki, pedaqoji heyətin peşəkarlığı da mühüm amildir: “Bağçada çalışan müəllim və tərbiyəçilərin ixtisaslı olması, uşaqlarla düzgün ünsiyyət qurması və onların inkişaf xüsusiyyətlərini nəzərə alması çox vacibdir.”
Ekspert əlavə edib ki, tədris proqramı və fəaliyyətlər də valideynlərin diqqət etməli olduğu məsələlərdəndir: “Məktəbəqədər təhsil müəssisələrində uşaqların inkişafına yönəlik oyun əsaslı fəaliyyətlər, yaradıcılıq və sosial bacarıqları inkişaf etdirən proqramlar tətbiq olunmalıdır.”
Onun sözlərinə görə, valideynlərlə bağça arasında kommunikasiya da önəmli rol oynayır: “Valideynlər müəssisə ilə daimi əlaqədə olmalı, uşağın inkişafı və gündəlik fəaliyyəti barədə mütəmadi məlumat ala bilməlidirlər.”
Sonda ekspert vurğulayıb ki, bağça seçimi zamanı əsas məqsəd uşağın özünü rahat və təhlükəsiz hiss etdiyi mühitin yaradılmasıdır: “Uşağın psixoloji rahatlığı və inkişafı valideynlərin seçimində əsas meyar olmalıdır.”