Bu gün Bakı şəhərində təhsil və psixologiya sahəsində fəaliyyət göstərən mütəxəssislər üçün əlamətdar tədbir baş tutub. “Birlik Events Academy” MMC-nin təşkilatçılığı və “Edu Forum” MMC-nin rəsmi tərəfdaşlığı ilə ölkənin ən fəal, yaradıcı və interaktiv pedaqoqlarını, həmçinin aparıcı psixoloqlarını bir araya gətirən I Forum keçirilib.
“Tehsil365” xəbər verir ki, forumun əsas məqsədi müasir təhsil metodologiyalarının müzakirəsi, yaradıcı yanaşmaların təşviqi və pedaqoji fəaliyyətlə psixoloji dəstəyin inteqrasiyasının gücləndirilməsi olub. Tədbir çərçivəsində iştirakçılar təcrübə mübadiləsi apararaq gələcəyin təhsil modelinin formalaşmasına xidmət edən yeni ideyalar ətrafında fikir mübadiləsi ediblər.
Forum zamanı bir sıra mühüm mövzular müzakirə olunub. İnteraktiv panel müzakirələri zamanı iştirakçılar ənənəvi çıxış formatından fərqli olaraq canlı dialoq və sual-cavab sessiyalarında iştirak ediblər. Pedaqoqlar dərslərin daha maraqlı və effektiv keçirilməsi üçün istifadə etdikləri rəqəmsal və kreativ təhsil alətlərini təqdim ediblər.
Eyni zamanda psixoloqlar təhsil mühitində emosional intellektin rolu və şagirdlərin psixoloji rifahının qorunması ilə bağlı vacib tövsiyələrini bölüşüblər. Forum həmçinin regionlardan və paytaxtdan gələn mütəxəssislər arasında yeni əməkdaşlıqların qurulması baxımından da əhəmiyyətli platforma rolunu oynayıb.
Təşkilat komitəsinin nümayəndəsi çıxışında bildirib ki, bu cür platformalar təhsil sisteminin inkişafı üçün mühüm əhəmiyyət daşıyır:
“Bu gün burada toplaşan hər bir mütəxəssis Azərbaycan təhsilinin gələcəyinə işıq tutan bir memardır. Məqsədimiz yalnız bilik vermək deyil, həm də yaradıcı və xoşbəxt fərdlər yetişdirməkdir”.
Tədbirin sonunda fəallığı ilə seçilən iştirakçılara sertifikatlar təqdim olunub. Təşkilatçılar bildiriblər ki, forumun gələcəkdə ənənəvi şəkildə hər il daha geniş tərkibdə keçirilməsi planlaşdırılır.
