Böyük Britaniyanın Azərbaycandakı səfirinin iqamətgahında “İkinci həyat” layihəsi çərçivəsində xalça sərgisi açılıb. Ekspozisiya Gəncədə keçirilən yaradıcılıq seminarının yekunu olub.
“Tehsil365" xəbər verir ki, tədbirdə mədəniyyət təşkilatlarının nümayəndələri və sənətçilər iştirak ediblər.
Tədbirin rəsmi hissəsini Böyük Britaniyanın Azərbaycan Respublikasındakı səfiri Ferqus Auld açaraq Azərbaycan dilində salamlama nitqi söyləyib. O, yaradıcı ictimaiyyətin nümayəndələrini iqamətgahda qarşılamaqdan məmnun olduğunu qeyd edərək, Gəncənin xüsusi əhəmiyyətini, seminarın keçirildiyi məkanı vurğulayıb. Bu seminarın yeri “Arts Council Azerbaijan” tərəfindən “Black Mountains College” ilə tərəfdaşlıqda təşkil olunub və “British Council” tərəfindən dəstəklənib.
“British Council” təşkilatının rəhbəri Nərgiz Hacıyeva tədbirin proqramı haqqında məlumat verib və mədəniyyət sahəsində beynəlxalq əməkdaşlığın zəruriliyini diqqətə çatdırıb. O qeyd edib ki, layihə Böyük Britaniya və Avropa ölkələrindən incəsənət sahəsində birgə təşəbbüsləri həyata keçirən təqribən 80 yaradıcı praktikləri bir araya gətirib.
Proqram çərçivəsində mədəniyyət xadimi Dadaş Məmmədov peşəkar təlim keçib və Azərbaycanda seminar təşkil edib. Gəncədəki işlər sərgidə nümayiş etdirilən bir sıra bədii xalça əsərlərinin yaranması ilə nəticələnib.
“Arts Council Azerbaijan”ın rəhbəri layihənin tərəfdaşlarına və iştirakçılarına təşəbbüsə verdikləri dəstəyə və töhfələrə görə təşəkkür edib.
Nar mövzusuna həsr olunmuş yeni kolleksiya “Black Mountains College” ilə əməkdaşlıqda və “British Council” təşkilatının dəstəyi ilə “İkinci həyat” layihəsinin bir hissəsi olaraq yaradılıb. Layihənin əsas məqsədi beynəlxalq mədəni əməkdaşlığı və müasir incəsənətlə ənənəvi bədii irs formaları arasında dialoqu inkişaf etdirməkdir.
Dadaş Məmmədov çıxışında müasir incəsənətin inkişafında Azərbaycanın bölgələrindən olan qadın rəssamların fəal rolunu xüsusi vurğulayıb.
Layihənin yaradıcıları Sona Quliyeva və Dadaş Məmmədovdur. Bu çərçivədə ilkin vəziyyətini itirən Azərbaycan xalçalarına ənənəvi və müasir bədii texnikaların kombinasiyası vasitəsilə yeni həyat verilir.
Rəsmi təqdimatdan sonra Britaniya səfiri sərginin rəssamları və qonaqları ilə söhbət edib, nümayiş olunan əsərlərin yüksək keyfiyyətini vurğulayıb.