ABŞ-nin Virciniya ştatında fəaliyyət göstərən Azərbaycan Evinin və Azərbaycan Respublikasının Diasporla İş üzrə Dövlət Komitəsinin birgə layihəsi olan Azərbaycan dili təqaüd proqramının (Ana dili kursu) bir qrup məzununa sertifikatlar təqdim olunub.
“Tehsil365” diasporla iş üzrə Dövlət Komitəsinə istinadən xəbər verir ki, bununla bağlı keçirilən tədbirdə proqram iştirakçılarının nailiyyətlərindən danışılıb, layihənin Azərbaycan dilinin öyrədilməsi və milli-mədəni dəyərlərin qorunması baxımından əhəmiyyəti vurğulanıb.
Diasporla İş üzrə Dövlət Komitəsinin şöbə müdiri Səlhət Abbasova çıxışında qeyd edib ki, ana dilinin gənc nəslə ötürülməsində müəllim və təşkilatçılarla yanaşı valideynlərin də rolu böyükdür. Onun sözlərinə görə, milli kimlik və vətənpərvərlik ilk növbədə ailədə formalaşır. O, ana dili dərslərində iştirak edən məktəbli soydaşlarımızın burada özlərinə azərbaycanlı dostlar qazandığını, bunun isə qürbətdə çox vacib məqam olduğunu diqqətə çatdırıb
Virciniya Azərbaycan Evinin rəhbəri Sevda Tahirli tələbələri təbrik edib, onların Azərbaycan dilinə və mədəniyyətimizə bağlılığını yüksək qiymətləndirib.
Proqramın rəhbəri Nigar İbrahimova layihənin inkişafı və əldə olunan nəticələr barədə təqdimat edib. Sertifikatların yalnız proqramın tələblərini uğurla yerinə yetirən şagirdlərə verildiyini bildirib.
Qeyd edək ki, Azərbaycan dili təqaüd proqramı 8 mart 2025-ci ildə fəaliyyətə başlayıb və hər biri üç ay davam edən mövsümlük kurslar əsasında həyata keçirilir. Proqramın ilk mövsümündə 14 şagird iştirak edib. Sonrakı mərhələlərdə iştirakçı sayı artıb və 2026-cı ilin yaz mövsümündə 34-ə çatıb.Proqramda 5–41 yaş aralığındakı iştirakçıların 60 faizini uşaqlar, 40 faizini isə böyüklər təşkil edir. Şagirdlər dərslərə ABŞ, Avropa və digər ölkələrdən qoşulur. Müdavimlər arasında xaricdə doğulan azərbaycanlı uşaqlar, Azərbaycandan yeni köçən ailələrin övladları, güneyli soydaşlarımız və Azərbaycan dilinə, mədəniyyətinə maraq göstərən xarici vətəndaşlar var. Hər mövsümün sonunda yekun qiymətləndirmədən uğurla keçən iştirakçılara sertifikat verilir.İştirakçı sayının artırılması, Azərbaycan dilinin icmalarla yanaşı, beynəlxalq auditoriya arasında daha geniş təşviqi Ana dili kursunun gələcək planlarına daxildir.