Martın13-də Mingəçevir Dövlət Universiteti (MDU) ilə ölkəmizi beynəlxalq və yerli turnirlərdə layiqincə təmsil edən, Azərbaycan şahmatının inkişafına mühüm töhfələr vermiş Məmmədyarovlar Şahmat Məktəbi arasında əməkdaşlıq haqqında memorandum imzalanıb.
"Tehsil365" xəbər verir ki, memorandum universitet və şahmat məktəbi arasında təhsil, elm və intellektual idmanın inkişafı istiqamətində qarşılıqlı faydalı əməkdaşlıq əlaqələrinin qurulmasını və genişləndirilməsini nəzərdə tutur.
Memorandumun imzalanması münasibətilə Mingəçevir Dövlət Universitetinin rektoru Anar Eminovun rəhbərlik etdiyi nümayəndə heyəti Məmmədyarovlar Şahmat Məktəbində olub. Nümayəndə heyətini məktəbin qurucuları və rəhbərləri – tanınmış şahmatçı Şəhriyar Məmmədyarov, Zeynəb Məmmədyarova və Türkan Məmmədyarova qəbul ediblər. Görüş zamanı tərəflər arasında universitet–idman əməkdaşlığının genişləndirilməsi, gənclər arasında intellektual idman növlərinin təşviqi və strateji düşüncə bacarıqlarının inkişaf etdirilməsi istiqamətində fikir mübadiləsi aparılıb.
Mingəçevir Dövlət Universitetinin rektoru Anar Eminov çıxışında universitetdə tələbələrin yalnız akademik biliklərinin deyil, eyni zamanda analitik və strateji düşünmə bacarıqlarının inkişafının vacibliyini vurğulayıb. Rektor bildirib ki, şahmat kimi intellektual idman növləri gənclərin məntiqi təfəkkürünün, qərarvermə bacarıqlarının və liderlik keyfiyyətlərinin formalaşmasında mühüm rol oynayır. O, MDU ilə Məmmədyarovlar Şahmat Məktəbi arasında qurulan əməkdaşlığın regionda şahmatın inkişafına və gənclərin intellektual potensialının gücləndirilməsinə mühüm töhfə verəcəyinə əminliyini ifadə edib.
Məmmədyarovlar Şahmat Məktəbinin rəhbərləri isə çıxışlarında gənclər arasında şahmatın təbliğinin əhəmiyyətindən bəhs ediblər və MDU rəhbərliyinin atdığı addımı yüksək qiymətləndiriblər. Bildirilib ki, universitet mühiti gənclərin intellektual inkişafı üçün geniş imkanlar yaradır və bu əməkdaşlıq çərçivəsində həyata keçiriləcək təşəbbüslər regionda şahmatın daha da populyarlaşmasına xidmət edəcək.
Görüş zamanı tərəflər arasında əməkdaşlığın perspektiv istiqamətləri müzakirə olunub. Xüsusilə Mingəçevir Dövlət Universitetinin nəzdində tələbələr və gənclər üçün şahmat klubunun yaradılması, regionda açıq şahmat oyunlarının və intellektual yarışların təşkili, peşəkar məşqçilərin iştirakı ilə ustad dərslərinin və təlimlərin keçirilməsi, məktəblilər üçün açıq şahmat günlərinin təşkil olunması, müxtəlif səviyyəli regional şahmat turnirlərinin keçirilməsi kimi təşəbbüslər diqqətə çatdırılıb.
Bununla yanaşı, universitetin elmi potensialından istifadə etməklə “AI Chess Research Lab” (Süni intellekt və şahmat üzrə tədqiqat laboratoriyası) yaradılması, şahmat oyunlarının süni intellekt əsaslı proqramlar vasitəsilə analizi, data əsaslı oyun strategiyalarının tədqiqi, eləcə də robotika və süni intellekt dərslərində şahmat modellərinin tətbiqi kimi innovativ istiqamətlər də əməkdaşlığın mühüm tərkib hissəsi kimi qeyd olunub.
Eyni zamanda tərəflər arasında hər il Ümummilli Lider Heydər Əliyevin doğum günü ərəfəsində regional və ya respublika səviyyəli şahmat turnirlərinin təşkili məsələsi də xüsusi vurğulanıb.
Qeyd edək ki, imzalanan Memorandum tərəflər arasında gənclər arasında şahmatın inkişafına dəstək verilməsi, strateji düşüncə və analitik bacarıqların inkişaf etdirilməsi, eləcə də elm, təhsil və intellektual idman sahələrində birgə təşəbbüslərin həyata keçirilməsi üçün mühüm əməkdaşlıq platforması yaradır. Eyni zamanda bu əməkdaşlıq regionda şahmatın inkişafına, gənclərin intellektual potensialının gücləndirilməsinə və universitet mühitində intellektual idman mədəniyyətinin daha da yayılmasına töhfə verməyi hədəfləyir.
