Onun sözlərinə görə, tibbi fəaliyyətin ən mühüm məsələlərindən biri məhz tibbi təhsildir.
Tanınmış tibb eksperti Adil Qeybulla “Tehsil365”ə verdiyi müsahibədə Azərbaycanda tibbi təhsil və tibbi fəaliyyət sahəsində mövcud vəziyyəti dəyərləndirib.
“Bilirsiniz ki, indi Azərbaycanda Bolonya sisteminə keçilib, rezidentura sistemi tətbiq olunub. Tibb Universitetində Qərb təbabətində olan ixtisasların, ixtisaslı həkimlərin yetişdirilməsi üçün müvafiq struktur dəyişiklikləri aparılıb. Bu işlər təhsildə yavaş-yavaş gedir. Tibbi təhsil spesifik sahə olduğu üçün bu istiqamətdə də inkişaf edir." – deyə Qeybulla bildirib.
Ekspert hesab edir ki, tibbi təhsildə müəyyən uğurlar əldə olunsa da, tibbi fəaliyyət sahəsində hələ də ciddi problemlər qalmaqdadır:
"Bizim kadr bazamız genişlənib, xəstəxanalarda maddi-texniki baza artıb. Məsələn, bu gün Onkologiya Elmi Mərkəzində və bəzi özəl xəstəxanalarda kifayət qədər müasir avadanlıqlar quraşdırılıb. Amma bunun vətəndaşın sağlamlığına fayda verməsi üçün təşkilati işlər görülməlidir. Bu da əsas məsələdir."
Qeybulla qeyd edib ki, onkoloji xəstəliklərin tam şəkildə dövlət tərəfindən qarşılanması hələlik mümkün deyil. Bu səbəbdən bəzi xərclər xəstələrin üzərinə düşür:
"Məsələn, ağıllı dərmanların alınması çox bahadır. Bu baxımdan bəzi şeylər insanlara izah edilməli, maarifləndirmə aparılmalıdır. Digər sahələrdə isə dövlət proqramlarından icbari tibbi sığortaya keçid edilməlidir ki, bütün fəaliyyət vahid proqram əsasında tənzimlənsin."
Ekspert əlavə edib ki, müxtəlif xəstəliklərin mənşəyinin araşdırılması da vacibdir. Əgər ölkə üzrə dünya statistikasından fərqli göstəricilər yaranırsa, onların səbəbləri mütləq araşdırılmalı və aradan qaldırılmalıdır.
"Mən hesab edirəm ki, bizim ən böyük problemimiz tibbi fəaliyyətin, tibbi işin təşkilindədir." – deyə Adil Qeybulla vurğulayıb.