Onun sözlərinə görə, bu iki amil insanın funksional fəaliyyətinin əsas dayaqlarından biridir.
Psixoloq Nabat Mirzəyeva “Tehsil365”ə verdiyi açıqlamada vurğulayıb ki, yuxu rejimi və düzgün qidalanma insan psixologiyasına birbaşa və güclü təsir göstərir.
“Əgər yuxu və qidalanma düzgün olmazsa, bu, bizim funksional fəaliyyətimizə zərərli təsir göstərəcək. Əksinə, balanslı qidalanma və nizamlı yuxu rejimi isə psixoloji rifahı gücləndirir,” – deyə Mirzəyeva bildirib.
Psixoloq ilk olaraq qidalanmanın təsirlərinə diqqət çəkib:
“Beyin orqanizmdə ən çox enerji tələb edən orqandır və qəbul etdiyimiz qidalar onun işləmə keyfiyyətini müəyyən edir. Vitamin və minerallarla zəngin balanslı qidalanma serotonin və dopamin kimi xoşbəxtlik hormonlarının normal səviyyədə ifrazına kömək edir. Bu da insanın gündəlik həyatında özünü xoşbəxt və rahat hiss etməsinə şərait yaradır. Zərərli qidalanma isə halsızlıq, əsəbilik, diqqət dağınıqlığı və hətta depressiv hallar yarada bilər.”
O, yuxunun psixoloji sağlamlıq üçün vacibliyini də xüsusi vurğulayıb:
“Yuxu psixoloji sağlamlığımızın bərpası üçün ən vacib mexanizmdir. Yuxu zamanı həm beyin, həm də bədən dincəlir. Gün ərzində alınan informasiyalar emal olunur, emosional gərginlik azalır, sinir sistemi özünü tənzimləyir. Keyfiyyətsiz və az yuxu isə stresin artmasına, aqressiyanın yüksəlməsinə və qərarvermə qabiliyyətinin zəifləməsinə səbəb olur. İnsan səhər oyandığında özünü gərgin, halsız və motivasiyasız hiss edir.”
Nabat Mirzəyeva əlavə edib ki, düzgün qidalanma və nizamlı yuxu rejimi insanın emosional stabilliyini qoruyur, stresə davamlılığını artırır və ümumi psixoloji rifahı gücləndirir:
“Psixoloji sağlamlıq yalnız emosiyalar və düşüncədən deyil, eyni zamanda düzgün həyat tərzindən asılıdır. Sağlam qidalanma və balanslı yuxu rejimi həm fiziki, həm də psixoloji cəhətdən insanı qoruyur.”