Serbiyanın Belqrad Universitetinin Filologiya fakültəsində fəaliyyət göstərən Azərbaycan Dili və Mədəniyyəti Mərkəzinin təşkilatçılığı ilə Novruz bayramına həsr olunmuş tədbir keçirilib.
“Tehsil365“ xəbər verir ki, Azərbaycan Dili və Mədəniyyəti Mərkəzindən məlumat verilib. Mərkəzin direktoru filologiya üzrə fəlsəfə doktoru Günel Babanlı tədbirdə çıxış edərək Novruzun xalqlar arasında birlik, həmrəylik və mədəni irsin qorunması baxımından əhəmiyyətini vurğulayıb, Azərbaycan dilinin və milli dəyərlərin gələcək nəsillərə ötürülməsinin vacibliyini xüsusi qeyd edib.
Tədbir çərçivəsində Azərbaycanın Serbiyadakı səfirliyinin birinci katibi Gülnarə Məmmədova “Multikulturalizm və yaz ənənələri” mövzusunda çıxış edərək, müxtəlif xalqlar arasında qarşılıqlı hörmət və mədəni dəyərlərin paylaşılmasının əhəmiyyətini vurğulayıb. Daha sonra iştirakçılara Novruz bayramına həsr edilmiş video təqdim olunub.
Filologiya fakültəsinin Şərqşünaslıq kafedrasının müdir müavini Mirjana Marinkoviç “Azərbaycan dilinin tədrisi” mövzusunda çıxış edərək bu sahədə görülən işlərdən danışıb. Bildirib ki, Mərkəz 2018-ci ildə Azərbaycan Dillər Universitetinin rektoru akademik Kamal Abdullanın təşəbbüsü, Azərbaycanın Serbiyadakı səfirliyi və Belqraddakı Azərbaycan Mədəniyyət Mərkəzinin dəstəyi ilə yaradılıb. Azərbaycan dilinin tədrisinə 2019-cu il oktyabrın 18-dən başlanılıb və bu istiqamətdə uğurlu nəticələr əldə olunmaqdadır.
Tədbirdə Yunus Əmrə İnstitutunun nümayəndəsi Emrah Doğan “Mədəniyyətlərarası dialoq” mövzusunda çıxış edərək xalqlar arasında əməkdaşlıq və qarşılıqlı anlaşmanın vacibliyini diqqətə çatdırıb.
Diasporla İş üzrə Dövlət Komitəsinin 4-cü və 6-cı yay məktəblərinin iştirakçıları Aleksandra Mosuroviç və Marija Radovanoviç Azərbaycan haqqında slayd təqdim ediblər. Belqrad Universiteti Filologiya fakültəsinin tələbəsi Mina Radoviç Novruz atributlarına həsr olunmuş slayd təqdim edərək Azərbaycan dilində məlumat verib
Tədbirdə Azərbaycanın və Türkiyənin Belqraddakı səfirliklərinin nümayəndələri, Yunus Əmrə İnstitutunun müəllimləri, Belqrad Universitetinin Filologiya fakültəsinin müəllim və tələbələri, eləcə də hazırda təhsillərini Serbiyada davam etdirən azərbaycanlı tələbələr iştirak ediblər.
Bayram tədbirində qonaqlara milli şirniyyatlar təqdim olunub.