İşğaldan azad edilmiş Füzuli şəhəri Novruz bayramı ərəfəsində növbəti tədbirə ev sahibliyi edib. Şəhərdəki Mirzə Uluqbəy adına 1 nömrəli tam orta məktəbdə İlaxır çərşənbə münasibətilə bayram konserti təşkil olunub.
“Tehsil365" xəbər verir ki, tədbirdə məktəbin müəllim və şagird kollektivi, Füzuli şəhərinə köçmüş sakinlər, eləcə də şəhərdə fəaliyyət göstərən müəssisələrin nümayəndələri iştirak ediblər. Bayram şənliyinin xüsusi qonaqları isə Füzulidə yeni istifadəyə verilmiş Kurmanqazi Uşaq Yaradıcılıq Mərkəzinin kollektivi olub.
Mərkəzin istedadlı üzvləri tərəfindən hazırlanan konsert proqramı iştirakçılara unudulmaz anlar yaşadıb. Proqram çərçivəsində milli rəqslərimiz nümayiş etdirilib, Azərbaycanın zəngin musiqi xəzinəsindən seçilmiş xalq və bəstəkar mahnıları səsləndirilib. Uşaqların ifasında təqdim olunan şən musiqi nömrələri və ritmik rəqslər tədbirə xüsusi rəng qatıb, yenidən qurulan Füzuli küçələrində bayram əhvali-ruhiyyəsini daha da canlandırıb.
Şənlikdə Novruzun qədim adət-ənənələrini əks etdirən maraqlı səhnəciklər nümayiş olunub. Səhnəciklərdə xalqımızın milli-mənəvi dəyərləri, sülh və xeyirxahlıq rəmzi olan bayram atributları əyani şəkildə canlandırılıb.
Çıxış edənlər qeyd ediblər ki, otuzillik fasilədən sonra doğma yurdumuzda alovlandırılan çərşənbə tonqalları xalqımızın sarsılmaz birliyinin və qələbə sevincinin təzahürüdür. Vurğulanıb ki, Novruz bayramı həm də Türk dünyasının mənəvi həmrəyliyinin rəmzidir.