Müasir dövrdə tələbələr arasında tükənmişlik sindromu (burnout) halları getdikcə daha çox diqqət çəkir. Bu vəziyyət uzunmüddətli stress və yorğunluq nəticəsində yaranır və tələbələrin həm akademik, həm də psixoloji vəziyyətinə təsir göstərir.
Mövzu ilə bağlı psixoloq “Tehsil365"ə açıqlama verib.
Psixoloqun sözlərinə görə, tükənmişliyin əsas səbəblərindən biri davamlı akademik yüklənmədir: “Dərslər, imtahanlar və tapşırıqlar tələbələrdə uzunmüddətli gərginlik yaradır.”
Mütəxəssis qeyd edib ki, istirahət və balansın olmaması da bu vəziyyəti daha da dərinləşdirir: “Tələbələr bəzən özlərinə vaxt ayırmadan yalnız dərsə fokuslanır və bu da emosional yorğunluğa səbəb olur.”
Psixoloq əlavə edib ki, motivasiya itkisi və məqsədsizlik hissi də tükənmişliklə əlaqəlidir: “Uzun müddət nəticə görməyən tələbələrdə maraq azalır və bu, psixoloji tükənməyə gətirib çıxarır.”
Sonda mütəxəssis bildirib ki, bu problemin qarşısını almaq üçün balanslı həyat tərzi vacibdir: “Düzgün vaxt planlaşdırılması, istirahət, sosial fəaliyyətlər və psixoloji dəstək tükənmişliyin qarşısını almaqda mühüm rol oynayır.”