Onun sözlərinə görə, imtahan öncəsi abituriyentlər ilk növbədə soyuqqanlı olmalı, həyəcanlanmamalı və imtahandan əvvəlki iki günü istirahətə ayırmalıdırlar.
Təhsil eksperti Elçin Süleymanov “Tehsil365“ə verdiyi açıqlamada qəbul imtahanlarında abituriyentlərin diqqət etməli olduğu əsas məqamlara toxunub.
“Abituriyentlər imtahana maksimum sərbəst və rahat geyimlə gəlməlidirlər. Qidalanmaya da diqqət etmək vacibdir. Çünki düzgün qidalanma imtahan zamanı həm fiziki, həm də psixoloji dayanıqlığı artırır,” – deyə Süleymanov bildirib.
Ekspert vurğulayıb ki, artıq bir neçə ildir tətbiq olunan sistem abituriyentlərin həyəcanını qismən azaltmağa kömək edir: “700 bal iki cəhdlə toplanır. Buraxılış imtahanı 300 bal, qəbul imtahanı isə 400 bal verir. Buraxılış imtahanı bir dəfə keçirilir, qəbul imtahanı isə iki dəfə. Yaxşı nəticə göstərməyən abituriyent ikinci şansda bilik və bacarıqlarını yenidən yoxlaya bilər.”
Elçin Süleymanov imtahan zamanı vaxt bölgüsünün düzgün aparılmasının vacibliyini də qeyd edib: “Abituriyentlər əvvəlcə bütün sualları gözdən keçirməli, rahat olanları cavablamalıdırlar. Daha sonra orta çətinlikdə olan suallara keçmək, ən çətin sualları isə sona saxlamaq məqsədəuyğundur. Ən vacib məqamlardan biri cavabların kodlaşdırma vərəqəsinə köçürülməsidir. Çox zaman tələbələr bunu unudur və ya tələsdikləri üçün səhvlərə yol verirlər.”
Ekspertin tövsiyəsinə görə, abituriyentlər imtahana ən yaxşı bildikləri fənnlə başlamalıdırlar: “Bu halda onlar daha sürətli çalışacaq və vaxt qazanacaqlar. İmtahanı son şans kimi görmək lazım deyil. Pis nəticə pessimizmə səbəb olmamalıdır, çünki növbəti imtahanda yenidən iştirak etmək mümkündür.”
Elçin Süleymanov əlavə edib ki, son illərdə abituriyentlər üçün təhsil sahəsində geniş imkanlar yaradılıb: “Artıq qəbul planı 75 minə yaxın yerdən ibarətdir və hər il artır. Ödənişli oxuyanlar üçün isə Təhsil Tələbə Krediti Fondu mövcuddur. Bu sistemlə tələbə təhsil haqqını ödəyir, məzun olduqdan sonra isə hissə-hissə geri qaytarır. Dolayısıyla abituriyentlər ödənişli oxumaq ehtimalına görə stresə girməməlidirlər.”
Ekspert sonda abituriyentlərə ixtisas seçimində diqqətli olmağı tövsiyə edib: “Sadəcə valideynin istəyinə uyğun deyil, abituriyentin öz maraqları və xüsusiyyətləri nəzərə alınmalıdır. Sevdiyi və gələcəkdə əmək bazarında qarşılığı olan ixtisası seçmək daha doğrudur. Dövlət qurumları və Əmək və Əhalinin Sosial Müdafiəsi Nazirliyi mütəmadi olaraq gələcəkdə populyar olacaq ixtisaslarla bağlı məlumatlar açıqlayır. Abituriyentlər bu məlumatlara diqqət etməlidirlər. Mən bütün imtahan iştirakçılarına uğurlar arzulayıram.”