"Müəllimlərin sertifikasiyadan iki dəfə keçməsi kifayətdir".
“Tehsil365” xəbər verir ki bunu Milli Məclisin martın 17-də keçirilən plenar iclasında deputat Vüqar Bayramov deyib.
O bildirib ki, incəsənət sektorunda beynəlxalq müsabiqə qaliblərinin sertifikatlaşdırmadan azad edilməsi məqsədəuyğun olardı:
“Eyni zamanda, Əmək Məcəlləsinin 67-ci maddəsində üç dəfə deyil, ən azı iki dəfə sertifikatlaşdırmadan keçmiş şəxslərin sertifikatlaşdırmaya cəlb olunmamasını təklif edərdim. Razılaşaq ki, iki dəfə sertifikatlaşdırmadan uğurla keçmək təhsil müəssisəsində keyfiyyətli təhsil vermək üçün kifayət edir”.
Azərbaycan Gənc Alim, Aspirant və Magistrlər Cəmiyyətinin sədri, fəlsəfə doktoru İlqar Orucov Musavat.com-a deputatın fikirlərini şərh edərkən bildirib ki, o da imtahan sayının azaldılmasının tərəfdarıdır:
“Biz müəllimləri hər 5 ildən bir imtahan etməyə məcbur edirik. Əgər müəllim iki dəfə sertifikasiyadan uğurla keçibsə, bu, onun peşəkarlığının təsdiqi üçün yetərli hesab olunmalıdır. Bu, təcrübəli, bilikli müəllimi növbəti dəfə imtahan cəlb etməkdən azad edəcək. İmtahan təcrübəli müəllimlərə stress yaşatmır, zatən, savadlı müəllim bunu yaşamır. Amma bu, onun zamanına müdaxilə etmək deməkdir. Müəllimin diqqəti tədrisin keyfiyyətinə deyil, verəcəyi imtahana yönəlir”.
Ekspert hesab edir ki, bu, müəllimlərə qarşı ədalətsiz yanaşmadır:
“Bu baxımdan deputatın fikirləri ilə razıyam. Sertifikasiyada uğur qazanmış müəllimlərin əməkhaqqında yanaşmaya gəlincə, 50 bal toplamış müəllim əməkhaqqına 10 faiz, 51 tap toplayan isə 35 faiz artımla maaş alır. Vüqar bəy bu kəskin fərqi aradan qaldırmağı təklif edir. Mən isə düşünürəm ki, keçid balından artıq, hər 10 ballıq şkala üzrə əməkhaqqına fərqli yanaşma tətbiq edək. Bu, daha ədalətli ola bilər”.
İ.Orucov hesab edir ki, incəsənət sektorunda beynəlxalq müsabiqə qaliblərinin sertifikatlaşdırmadan azad edilməsi də ədalətli yanaşma olardı.