Ustad aşıq Dədə Ələsgərin yaradıcılığını əks etdirən yeniyetmələr üçün “Sarı köynək” adlı yeni kitabın təqdimatı olub.
“Tehsil365” xəbər verir ki, kitabda Aşıq Ələsgərin külliyatından seçmə əsərlər toplanıb.
Tədbirdə çıxış edən kitabı nəşrə hazırlayan Dədə Ələsgərin kötücəsi Aysel Zahidqızı “Sarı köynək” barədə məlumat verib. O diqqətə çatdırıb ki, kitab 12 yaşdan yuxarı məktəblilər üçün nəzərdə tutulan ilk xüsusi topludur. “Layihənin əsas məqsədi aşıq sənətini daha müasir tərtibatda kitab halında təqdim etməklə azyaşlı oxucularda bu sənətə maraq oyatmaqdır. Nəşrdə yer alan 13 müxtəlif bölmə istedadlı rəssam Orxan Qarayev tərəfindən hazırlanıb, bir-birindən maraqlı məna və obrazları əks etdirən rəsmlərlə tamamlanıb. Kitabın üz qabığı da mücərrəd üslubda hazırlanaraq Aşıq Ələsgərin şəxsiyyətini və yaradıcılığını simvolik şəkildə təcəssüm etdirir. Kitab “TEAS Press” nəşriyyat evinin “3 alma” uşaq ədəbiyyatı bölməsi tərəfindən nəşrə hazırlanıb və Türkiyədə çap olunub”,- deyə A.Zahidqızı əlavə edib.
“Dədə Ələsgər Ocağı” İctimai Birliyinin sədri, Aşıq Ələsgərin nəticəsi, kitabın “Ön söz” müəlliflərindən biri Xətai Ələsgərli qeyd edib ki, yeni nəşr məzmun və ideya baxımından seçilir və xüsusi dəyərə malikdir.
İctimai Birliyin də Aşıq Ələsgərin vəfatının 100 illiyi münasibətilə kitab hazırladığını vurğulayan X.Ələsgərli deyib: “Kitab nəşri məsuliyyətli və əhəmiyyətli prosesdir. Qarşıya qoyulan əsas məqsəd Aşıq Ələsgər irsinin gənc nəslə daha dolğun şəkildə çatdırılmasıdır. Bu kitab həmin istiqamətdə mühüm vasitə kimi çıxış edir. Aşıq Ələsgərin vəfatının 100 illiyi münasibətilə ona həsr olunan şeirlər toplusunun nəşri də bu missiyanın tərkib hissəsidir”.
Kitabın “Ön söz” müəlliflərindən biri Azərbaycan Milli Elmlər Akademiyasının (AMEA) Nizami Gəncəvi adına Ədəbiyyat İnstitutunun əməkdaşı filologiya üzrə fəlsəfə doktoru Orxan İsayev, “3 alma” uşaq ədəbiyyatının baş redaktoru Arzu Cəfərova və digər çıxışçılar kitab barədə fikirlərini bölüşüblər.
Tədbirdə aşıq sənətində məxsus musiqi nömrələri səsləndirilib.