Təhsil eksperti Ramin Nurəliyev hesab edir ki, orta ümumtəhsil məktəblərində dərslərin daha maraqlı və effektiv olması üçün ilk növbədə tədris sistemində köklü dəyişikliklər aparılmalıdır.
Ramin Nurəliyev “Tehsil365”ə açıqlamasında bildirib ki, mövcud tədris sistemi nə ali təhsil müəssisələrinə qəbul baxımından, nə də ümumi orta təhsil səviyyəsində arzu olunan nəticəni vermir:
“Hazırkı vəziyyət heç kimi qane etmir. Tədris sistemi nə universitetə hazırlıq üçün yetərlidir, nə də ümumi biliklərin formalaşdırılması baxımından effektivdir”.
Ekspert qeyd edir ki, problemin həlli üçün tədris sistemi mərhələlər üzrə yenidən qurulmalıdır. O, orta məktəblərdə təhsilin iki əsas mərhələyə bölünməsini təklif edir:
“Birinci mərhələ ibtidai təhsildir və 1–4-cü sinifləri əhatə etməlidir. İkinci mərhələ isə icbari təhsil kimi 5–9-cu sinifləri əhatə etməli, şagirdlər 9-cu sinifin sonunda imtahan verərək attestat almalıdırlar”.
Onun fikrincə, 10–12-ci siniflər artıq ixtisaslaşmış hazırlıq mərhələsi kimi təşkil olunmalıdır. Bu yanaşma dünya ölkələrinin böyük əksəriyyətində tətbiq olunan 12 illik təhsil modelinə uyğundur:
“10, 11 və 12-ci siniflərdə şagirdlər seçdikləri ixtisas qruplarına uyğun şəkildə təhsil almalıdırlar. Məsələn, üçüncü və ya dördüncü ixtisas qrupuna hazırlaşan şagirdlər həmin istiqamət üzrə fənlərə daha çox fokuslanmalıdırlar”.
Ramin Nurəliyev vurğulayır ki, bu dəyişikliklərlə yanaşı, müəllim seçiminə də xüsusi diqqət yetirilməlidir:
“Sertifikasiya imtahanlarında yüksək nəticə göstərən müəllimlər xüsusilə yuxarı siniflərdə, ali təhsilə hazırlıq istiqamətində tədris prosesinə cəlb olunmalıdırlar”.
Ekspert cəmiyyətdə səsləndirilən “məktəblərdə dərs keçirilmir” fikirlərinə də münasibət bildirib. Onun sözlərinə görə, problem dərsin keçirilməməsində deyil, proqramın effektiv olmamasındadır:
“Dərslər keçirilir. Müəllimlər verilən proqram əsasında dərs deyirlər. Amma mövcud proqram şagirdləri universitetə hazırlıq baxımından təmin etmir. Bu səbəbdən şagirdlər repetitor və hazırlıq kurslarına üz tuturlar”.
Ekspert hesab edir ki, təklif olunan model tətbiq olunarsa, məktəblərdə həm tədrisin keyfiyyəti, həm də şagirdlərin davamiyyəti artacaq:
“Bu gün şagird məktəbdən fayda əldə etmədiyi üçün ora getmək istəmir. Əgər məktəbdə birbaşa universitetə hazırlıq dərsləri təşkil olunarsa, bu, həm məktəbi daha cəlbedici edər, həm də şagirdlərin əlavə xərclərdən asılılığını azaldar”.