“Fitrə zəkatı Ramazan Bayramı ərəfəsində verilən və cəmiyyətdə yardımlaşmanı artıran mühüm ibadətlərdən biridir”.
Bu sözləri “Tehsil365”ə açıqlamasında Azərbaycan Qiymətləndiricilər Palatasının üzvü Süleyman Tağıyev bildirib.
Onun sözlərinə görə, fitrə zəkatı yalnız dini vəzifə deyil, eyni zamanda cəmiyyət daxilində sosial bərabərliyin təmin olunmasına xidmət edir.
“Fitrə zəkatı Ramazan Bayramı ərəfəsində verilən vacib maliyyə ibadətlərindən biridir. Bu zəkat növü orucun qəbul olunmasına mənəvi dəstək sayılır və eyni zamanda cəmiyyət daxilində sosial bərabərliyin təmin olunmasına xidmət edir”, – deyə o qeyd edib.
Süleyman Tağıyev bildirib ki, fitrə zəkatı maddi imkanı olan hər bir müsəlmana vacibdir və ailə başçısı öz himayəsində olan şəxslər üçün də bu zəkatı verməlidir.
İlahiyyatçı əlavə edib ki, fitrə zəkatı əsasən gündəlik qida məhsulları əsasında hesablanır və müasir dövrdə bunun pul qarşılığı müəyyən edilir. Onun sözlərinə görə, Azərbaycanda bu məbləğ adətən bir nəfər üçün 10–15 manat aralığında tövsiyə olunur.
“Fitrə zəkatı Ramazan Bayramı namazından əvvəl verilməlidir. Ən ideal vaxt isə Ramazan ayının son günləridir ki, ehtiyaclı insanlar bayrama hazırlaşa bilsinlər”, – deyə o vurğulayıb.
O qeyd edib ki, fitrə zəkatı əsasən kasıblara, ehtiyac sahiblərinə və sosial cəhətdən çətin vəziyyətdə olan insanlara verilməlidir.
Süleyman Tağıyev vurğulayıb ki, bu ibadət insanların bir-birinə dəstək olmasına, mərhəmət və paylaşma dəyərlərinin güclənməsinə səbəb olur.
“Bu, yalnız dini bir vəzifə deyil, həm də cəmiyyət qarşısında sosial məsuliyyətdir. Ehtiyaclı insanları sevindirmək və onların duasını almaq bu ibadətin ən gözəl nəticələrindən biridir”, – deyə o fikrini yekunlaşdırıb.