Müasir dövrdə gənclərin ailə qurarkən qarşılaşdıqları əsas problemlərdən biri fərdi ego və yanaşmaların ön plana çıxarılmasıdır. Mütəxəssislər hesab edir ki, bu yanaşma ailədaxili münasibətlərdə anlaşılmazlıqlara və münaqişələrə səbəb olur.
Psixoloq Nuriyya Quliyeva “Tehsil365”ə açıqlamasında bildirib ki, gənclər ailə qurarkən “mən” yox, “biz” anlayışını mənimsəməlidirlər:
“Bu gün gənclər ailə qurarkən təəssüf ki, daha çox öz ‘mən’lərini ön plana çəkirlər. Halbuki ailə ‘biz’ deməkdir. Hər iki tərəf fərqli ailələrdə böyüyüb və hərəsinin öz qaydaları, yanaşmaları var. Amma bu fərqliliklər olduğu kimi yeni qurulan ailəyə daşınmamalıdır. Artıq onlar valideyn yox, həyat yoldaşı rolundadırlar və bunu dərk etməlidirlər”.
Psixoloqun sözlərinə görə, münasibətlərdə “mən dediyim olacaq” yanaşması ciddi problemlərə gətirib çıxarır:
“Bəzən cütlüklər düşünür ki, qərarlar yalnız onların istədiyi kimi olmalıdır. Bu isə qaçılmaz olaraq toqquşmalara səbəb olur. Sağlam münasibət üçün tərəflər ‘mən’ yox, ‘biz’ kimi düşünməyi, güzəşt etməyi və problemləri müzakirə yolu ilə həll etməyi bacarmalıdırlar”.
Nuriyya Quliyeva həmçinin texnologiyanın və sosial medianın ailədaxili münasibətlərə təsirindən də danışıb. Onun sözlərinə görə, sosial şəbəkələrdə təqdim olunan ideal həyat tərzi gənclərdə yanlış gözləntilər yaradır:
“Sosial mediada gördüyümüz həyat tərzi əksər hallarda reallığı əks etdirmir. Lüks həyat, bahalı geyimlər və ideal münasibət görüntüsü insanlarda əsassız tələblər formalaşdırır. Bundan əlavə, texnologiyadan həddindən artıq istifadə cütlüklər arasında ünsiyyəti zəiflədir”.
Ekspert qeyd edib ki, müasir cütlüklərin əsas problemlərindən biri də ünsiyyət çatışmazlığıdır:
“Cütlüklər problemləri danışmağı, dinləməyi və müzakirə etməyi bacarmalıdırlar. Açıq ünsiyyət olmadan sağlam münasibət qurmaq mümkün deyil”.
Psixoloq ailədaxili məsələlərə kənar müdaxilənin də düzgün olmadığını vurğulayıb:
“Ailə daxilində yaranan problemlər həmin ailənin öz daxilində həll olunmalıdır. Nə qız, nə də oğlan tərəfinin ailəsinin bu məsələlərə müdaxiləsi doğru deyil”.
Sonda o əlavə edib ki, iqtisadi çətinliklər də münasibətlərə təsir göstərir:
“İqtisadi problemlər gərginlik yarada bilər. Amma qarşılıqlı dəstək və anlayışla bu çətinlikləri birlikdə aşmaq mümkündür”.