Azərbaycan Dillər Universitetində (ADU) tələbələrin yaradıcılıq sərgisi açılıb. Sərgidə universitetin müxtəlif fakültə və ixtisaslarında təhsil alan istedadlı gənclərin əl işləri nümayiş etdirilib.
“Tehsil365” xəbər verir ki, ADU-nun rektoru, akademik Kamal Abdulla sərgi ilə tanış olub.
Sərgidə Fatimə Səfərova, Mehriban Hümmətova, Səbinə Hüseynova, Safura Bağırova, Elmira Ağabalayeva, Şamruz Hüseynova və Sevinc Haqverdiyevanın hazırladıqları sənət nümunələri ziyarətçilərin xüsusi diqqətini cəlb edib.
Sərgi çərçivəsində müxtəlif mövzuları əhatə edən zəngin ekspozisiya təqdim olunub. Ekspozisiyada mozaika işləri, dekorativ-tətbiqi sənət nümunələri, rəsm və bədii kompozisiyalar, eləcə də gil qablar nümayiş etdirilib və böyük maraq doğurub. İştirakçılar yalnız öz yaradıcılıq bacarıqlarını nümayiş etdirməklə kifayətlənməyib, eyni zamanda sənətə fərdi yanaşmalarını da tamaşaçılarla bölüşüblər.
Təşkilatçılar qeyd ediblər ki, bu kimi tədbirlər tələbələrin yaradıcılıq potensialının üzə çıxarılması və inkişaf etdirilməsi baxımından mühüm əhəmiyyət daşıyır. Eyni zamanda sərgi gənclər arasında incəsənətə marağın artırılmasına xidmət edir və onların estetik dünyagörüşünün formalaşmasına töhfə verir.
Layihənin rəhbəri, ADU-nun coğrafiya müəllimi Şəhla Xələfova bildirib ki, gələcəkdə də bu tip yaradıcılıq sərgilərinin davamlı şəkildə keçirilməsi planlaşdırılır. Onun sözlərinə görə, tələbələrin istedadlarının dəstəklənməsi universitetin prioritet istiqamətlərindən biridir.
Qeyd edək ki, sərgi ziyarətçilər tərəfindən böyük maraqla qarşılanıb. Tədbir iştirakçıları və qonaqlar yaradıcılıq mühitində səmərəli vaxt keçiriblər.
