Martın 19-da AMEA-nın Nizami Gəncəvi adına Ədəbiyyat İnstitutunda Xalq şairi, görkəmli dramaturq və ictimai xadim, akademik Səməd Vurğunun 120 illik yubileyinə həsr olunmuş elmi sessiya keçirilib. Tədbirdən öncə iştirakçılar şairin həyat və fəaliyyətini əks etdirən nəşrlərdən ibarət sərgi ilə tanış olublar.
Bu barədə “Tehsil365” ə institutdan məlumat verilib. Sessiyanı açan AMEA-nın prezidenti akademik İsa Həbibbəyli bildirib ki, tədbir dövlətimizin başçısının 2026-cı il 23 fevral tarixli Sərəncamına əsasən hazırlanan Tədbirlər Planı çərçivəsində təşkil edilib. Akademik qeyd edib ki, Səməd Vurğun Azərbaycan ədəbiyyatında yeni məktəb yaratmış fenomen şəxsiyyətlərdən biridir. Onun 1954-cü ildə Moskvada keçirilən SSRİ Yazıçılarının II Qurultayındakı geniş məruzəsi sənətkara verilən yüksək dəyərin göstəricisi idi.
İsa Həbibbəyli şairin təkcə bədii yaradıcılığına deyil, həm də elmi fəaliyyətinə diqqət çəkib. Bildirilib ki, Səməd Vurğun AMEA-nın 15 təsisçisindən biri olmaqla yanaşı, 1954-1956-cı illərdə Akademiyanın vitse-prezidenti vəzifəsində çalışıb. Həmin illərdə o, üçcildlik “Azərbaycan ədəbiyyatı tarixi”nin hazırlanmasında mühüm rol oynayıb, Qobustan qayalarının mühafizəsini təmin edib, Nizami, M.F.Axundzadə və Sabir yaradıcılığına dair fundamental məqalələr yazıb.
“Səməd Vurğunun Qasım bəy Zakirin lirikası haqqında dissertasiyası və poeziyaya dair məruzələri elmi sanbalına görə doktorluq dissertasiyası səviyyəsindədir”, - deyə AMEA rəhbəri vurğulayıb. O, həmçinin şairin “Ədəbiyyat ideal qəhrəmansız ola bilər, amma idealsız ola bilməz” fikrini xatırladıb.
Elmi sessiya çərçivəsində Mərkəzi Elmi Kitabxananın direktoru texnika elmləri doktoru Hüseyn Hüseynov tərəfindən hazırlanmış “Səməd Vurğun elektron bazası” təqdim olunub.
Daha sonra filologiya elmləri doktoru Vaqif Yusifli, professor Asif Rüstəmli, dosentlər Aslan Salmansoy, Aygün Bağırlı və İlham Məmmədli şairin irsi, dramaturgiyası, Gəncə dövrü yaradıcılığı və dördlükləri haqqında məruzələrlə çıxış ediblər. Məruzələrdə ilk dəfə üzə çıxarılan arxiv materialları və faktlar təqdim edilib.
Tədbirin sonunda Səməd Vurğunun ev-muzeyinin direktoru Vurğun Vəkilova professor Asif Rüstəmli tərəfindən arxivdən tapılmış yeni əlyazmanın surəti hədiyyə edilib. V.Vəkilov şairin xatirəsinə göstərilən yüksək ehtirama görə təşkilatçılara minnətdarlığını bildirib.