Bakı Dövlət Universitetinin (BDU) İnformasiya və sənəd menecmenti fakültəsində Xalq şairi Səməd Vurğunun 120 illiyinə həsr olunmuş elmi seminar keçirilib.
Universitetdən “Tehsil365” ə bildirilib ki, elmi seminarda BDU-nun Redaksiya-nəşriyyat işi kafedrasının müdiri dosent Knyaz Aslan “Xalq şairi Səməd Vurğunun irsində kitab və mütaliə” mövzusunda məruzə edib. Knyaz Aslan bildirib ki, Azərbaycanın görkəmli şəxsiyyətlərinin yubileylərinin keçirilməsi, onların irsinin təbliği hər zaman xalqımızın Ümummilli Lideri Heydər Əliyevin diqqət mərkəzində olub. O qeyd edib ki, Ulu Öndər Səməd Vurğunun yaradıcılığını hər zaman yüksək qiymətləndirib, hələ sovet dövründə böyük şairin 70 illik yubileyinin ittifaq səviyyəsində qeyd olunmasına nail olub. Knyaz Aslan müstəqillik illərində də Ümummilli Liderin şairin ədəbi-bədii irsini geniş şəkildə təbliğ etdiyini söyləyib.
Prezident İlham Əliyevin “Xalq şairi Səməd Vurğunun 120 illiyinin qeyd edilməsi haqqında” 2026-cı il 23 fevral tarixli Sərəncamının əhəmiyyətini vurğulayan natiq bildirib ki, ölkə rəhbərinin mütəfəkkir şairin yaradıcılığına verdiyi yüksək qiymət Səməd Vurğun irsinin müxtəlif aspektlərdən araşdırılmasını elm və təhsil müəssisələrinin qarşısında mühüm vəzifə kimi qoyur.
Məruzədə ustad sənətkarın yaradıcılığında kitab və mütaliə məsələləri geniş şəkildə təhlil olunub. Bildirilib ki, Səməd Vurğun həm bədii əsərlərində, həm də elmi-publisistik məqalələrində kitaba, mütaliəyə yüksək qiymət verərək onu təbliğ edib. Məruzəçi şairin əsərlərində bu mövzuların əksini tapdığı poetik nümunələri və elmi qənaətləri səsləndirib, şairin yaradıcılığının ölkəmizdə mütaliə mədəniyyətinin inkişafında və oxucu zövqünün formalaşmasında mühüm rol oynadığını vurğulayıb.
Səməd Vurğunun ev-muzeyinin direktoru görkəmli ədibin nəticəsi Vurğun Vəkilov çıxış edərək tədbirin təşkilinə görə BDU rəhbərliyinə, eləcə də məruzəçiyə və seminar iştirakçılarına təşəkkürünü bildirib.
Müzakirələrlə davam edən seminarın sonunda iştirakçıların sualları cavablandırılıb