Onun sözlərinə görə, bu dərslərin daha səmərəli həyata keçirilməsi üçün yalnız məktəb müəllimlərinin deyil, eyni zamanda peşəkar hüquqşünasların, hüquq fakültəsi müəllimlərinin ictimai əsaslarla məktəblərə dəvət olunması faydalı ola bilər.
Hüquqşünas Şamil Paşayev “Tehsil365 “ə verdiyi açıqlamada bildirib ki, məktəblərdə insan və cəmiyyət dərsi əvvəllər mövcud idi, indi isə həyat bilgisi və digər dərsdənkənar mövzularla bağlı dərslər keçirilir.
“Əgər bu proses peşəkar hüquq bilgilərinin öyrədilməsi ilə müşayiət olunsa, şagirdlər hüquqlarını daha yaxşı mənimsəyə bilərlər. Məsələn, Azərbaycan Konstitusiyası ilə bağlı dərslər əvvəllər keçirilsə də, onları əsasən coğrafiya, tarix və ya ədəbiyyat müəllimləri tədris edirdi. Halbuki bu dərslərin peşəkar hüquqşünaslar tərəfindən aparılması daha məqsədəuyğun olardı,” – deyə Paşayev vurğulayıb.
Ekspert əlavə edib ki, məktəblərdə müxtəlif peşə sahiblərinin şagirdlərlə görüşləri təşkil olunur. Bu görüşlər daha çox blogerlər, aktyorlar, müğənnilər, şairlər və yazıçılarla baş tutur. “Gələcəkdə peşəkar hüquqşünasların, filosofların və digər mütəxəssislərin dəvət olunması ilə şagirdlərə ilkin hüquq bilgilərinin öyrədilməsi istiqamətində daha əsaslı işlər görmək mümkündür,” – deyə hüquqşünas fikrini tamamlayıb.