Novruz bayramı münasibətilə Azərbaycan Dövlət Pedaqoji Universitetinin fakültə və filiallarında silsilə tədbirlər təşkil olunub.
“Tehsil365“ xəbər verir ki,universitetdən bildirilib ki, Filologiya fakültəsinin nəzdində fəaliyyət göstərən “Meh” ədəbi dərnəyinin təşkilatçılığı ilə keçirilən tədbirdə Novruz adət-ənənələri nümayiş etdirilib, bayramın rəmzi atributları və xalqımızın qədim mərasimləri təqdim olunub. Tələbələr Novruza həsr olunmuş şeirlər söyləyib, milli musiqi nümunələri ifa edib və rəqs nömrələri təqdim ediblər.
Məktəbəqədər təhsil fakültəsində Tələbə Elmi Cəmiyyətinin təşkilatçılığı ilə “Baharın təravəti -gənclərin sədasıyla” adlı tədbir keçirilib. Tələbələr musiqi və rəqs nümunələri təqdim ediblər, habelə bayramın tarixi və ənələri ilə bağlı məlumat verilib.
Tarix və coğrafiya fakültəsində “Tərəqqi” dərnəyinin təşkilatçılığı ilə “Baharın sədası” adlı tədbir keçirilib. Tədbirdə Novruzun ruhunu əks etdirən səhnəciklər və çıxışlara yer verilib, şeirlər və musiqi əsərləri səsləndirilib.
İncəsənət və fiziki tərbiyə fakültəsində musiqi müəllimliyi ixtisasının IV kurs tələbələri tərəfindən Novruz bayramına həsr olunmuş tədbir keçirilib. Tədbirdə milli musiqimiz səsləndirilib, xalqımızın qədim adət-ənənələrini, milli-mənəvi dəyərlərini əks etdirən kompozisiyalar təqdim olunub.
Fizika fakültəsində isə “Xonça müsabiqəsi” keçirilib.
Şəki filialında Karyera mərkəzi və Tələbə Gənclər Təşkilatı tərəfindən birgə keçirilən tədbirdə musiqili-bədii proqram təqdim edilib. Şamaxı filialında tələbələrin iştirakı ilə səhnəciklər təqdim olunub, müxtəlif oyunlar və müsabiqələr keçirilib.
ADPU-nun nəzdində Pedaqoji Kollecdə isə “Novruz gəlir, yaz gəlir” adlı tədbir təşkil edilib.