Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyi və Mədəniyyət Nazirliyinin Abşeron-Xızı Regional Mədəniyyət İdarəsinin S.Rüstəmov adına 3 nömrəli Uşaq İncəsənət Məktəbinin birgə təşkilatçılığı ilə “Baharın rəngləri” adlı konsert keçirilib.
Agentliyin İctimaiyyətlə əlaqələr və kommunikasiya şöbəsindən “Tehsil365"ə verilən məlumata görə, Sumqayıt şəhərində yerləşən Heydər Əliyev Mərkəzində keçirilən tədbirdə agentliyin İxtisaslaşmış Sosial Xidmət Mərkəzlərində sosial reabilitasiya proqramına cəlb olunan uşaqlar, onların valideynləri, eləcə də yerli sakinlər iştirak ediblər.
Konsertdə “Parla” inklüziv-mədəni kollektivinin çıxışları təqdim olunub. Həmçinin S.Rüstəmov adına 3 nömrəli Uşaq İncəsənət Məktəbinin şagirdləri səhnəyə çıxıblar.
Onlar müxtəlif rəqslər və mahnılar ifa ediblər. Eyni zamanda, musiqi alətlərində çıxışlar və xor nömrələri nümayiş olunub.

