Türkiyənin İzmir şəhərində baş verən ağır qəza 11 yaşlı uşağın ölümü ilə nəticələnib.
“Tehsil365" Türkiyə mediasına istinadən xəbər verir ki, Mehmet Dönmez adlı uşaq atasına məxsus tarlada işləyərkən traktora qoşulmuş torpaq işləmə qurğusuna ilişərək ağır xəsarətlər alıb.
Əraziyə dərhal təcili tibbi yardım və hüquq-mühafizə orqanlarının əməkdaşları cəlb edilsə də, həkimlərin səylərinə baxmayaraq uşağın həyatını xilas etmək mümkün olmayıb.
Qəza anı yaxınlıqdakı təhlükəsizlik kamerası tərəfindən qeydə alınıb. Görüntülərdə hadisədən sonra atasının ağır psixoloji sarsıntı keçirdiyi, həmçinin bir qadının kömək üçün hadisə yerinə qaçdığı əks olunub.
Faktla bağlı araşdırma başladılıb.