Məktəblərdə İngilis dili fənninin tədrisi zamanı bir sıra çətinliklər müşahidə olunur. Müəllimlərin sözlərinə görə, bu problemlər əsasən şagirdlərin dil bacarıqlarının praktik tətbiqi ilə bağlıdır.
İngilis dili müəlliməsi Xanım Babayeva “Tehsil365"ə bildirib ki, şagirdlərdə ən çox rast gəlinən problem danışıq bacarığının zəif olmasıdır:
“Şagirdlər qrammatikanı müəyyən qədər öyrənsələr də, onu real ünsiyyət zamanı tətbiq etməkdə çətinlik çəkirlər.”
Onun sözlərinə görə, bu vəziyyətin əsas səbəblərindən biri praktikanın az olmasıdır:
“Dil öyrənmək üçün davamlı danışıq və dinləmə vacibdir. Lakin dərs saatlarının məhdudluğu bu bacarıqların inkişafına tam imkan vermir.”
Müəllimə qeyd edib ki, şagirdlərin motivasiyası da mühüm rol oynayır:
“Şagirdlər dili real həyatda istifadə edə biləcəklərini hiss etdikdə daha çox maraq göstərirlər. Əks halda, öyrənmə prosesi yalnız nəzəri səviyyədə qalır.”
O əlavə edib ki, texnologiya düzgün istifadə edildikdə tədris prosesinə müsbət təsir göstərir:
“Müxtəlif tətbiqlər, videolar və onlayn resurslar şagirdlərin dil bacarıqlarını inkişaf etdirməyə kömək edir. Lakin həddindən artıq istifadə diqqət dağınıqlığı yarada bilər.”
Sonda müəllimə vurğulayıb ki, İngilis dili tədrisində əsas məqsəd yalnız qaydaların öyrədilməsi deyil, şagirdlərin dili sərbəst istifadə etmə bacarığının formalaşdırılmasıdır.