Müasir dövrdə təhsil sistemində baş verən dəyişikliklər şagirdlərin düşüncə tərzinə və dünyagörüşünə də təsirsiz ötüşmür. Xüsusilə ədəbiyyat fənninin rolu bu kontekstdə daha çox müzakirə olunur.
Mövzu ilə bağlı tanınmış yazar İradə Aytel “Tehsil365"ə açıqlama verib.
Yazar bildirib ki, müasir təhsil sistemi əvvəlki dövrlərlə müqayisədə ciddi dəyişikliklərə məruz qalıb: “Əvvəllər orta məktəblərdə bütün fənlər eyni səviyyədə tədris olunur, şagirdlərdən hər bir fənn üzrə hazırlıq tələb edilirdi. Bu isə onların çoxcəhətli düşüncə tərzinin formalaşmasına şərait yaradırdı. Hazırkı sistem isə daha çox ixtisaslaşmaya yönəlib və şagirdlər yalnız gələcək peşələrinə uyğun fənlərə üstünlük verirlər.”
Onun sözlərinə görə, bu yanaşma müəyyən mənfi nəticələrə səbəb olur: “Digər fənlərə marağın azalması, xüsusilə humanitar sahələrə laqeyd yanaşma şagirdin estetik və emosional inkişafına mənfi təsir göstərir.”
Yazar qeyd edib ki, bu tendensiya artıq real məktəb mühitində də özünü göstərir: “Bəzən şagirdlər müəyyən fənləri lazımsız hesab edirlər. Məsələn, gələcəkdə həkim olmaq istəyən bir şagirdin rəsm dərsinə ehtiyac duymadığını düşünməsi bu yanaşmanın nəticəsidir.”
Mütəxəssis vurğulayıb ki, əslində hər bir fənn şagirdin bütöv dünyagörüşünün formalaşmasına xidmət edir: “Ədəbiyyat dərsləri şagirdlərə sevgi, qəhrəmanlıq, humanizm kimi ali dəyərləri aşılayır. Bu dəyərlərlə tanış olmayan şagirdin emosional və mənəvi inkişafı natamam qala bilər.”
Yazar əlavə edib ki, müasir dövrdə texnologiyanın təsiri ilə ünsiyyət problemləri artmaqdadır: “Belə bir şəraitdə ədəbiyyat dərslərinin rolunu azaltmaq bu problemləri daha da dərinləşdirə bilər.”
Sonda o qeyd edib ki, ədəbiyyat fənni yalnız bilik verməklə kifayətlənmir: “Ədəbiyyat dərsləri şagirdin emosional zənginliyini, analitik düşüncə qabiliyyətini və humanist dünyagörüşünü formalaşdırır. Bu baxımdan onun keyfiyyətli tədrisi cəmiyyətin gələcəyi üçün mühüm əhəmiyyət daşıyır.”