Ədəbiyyat dərslərində şagirdlərin müxtəlif obrazlarla tanış olması və onların həyatını “yaşaması” təhsil prosesinin mühüm hissələrindən biridir. Mütəxəssislər bildirirlər ki, bu proses uşaqların emosional və psixoloji inkişafına birbaşa təsir göstərir.
Mövzu ilə bağlı psixoloq “Tehsil365"ə açıqlama verib.
Psixoloqun sözlərinə görə, obrazlarla empatiya qurmaq uşaqlarda duyğusal zəkanın inkişafına kömək edir: “Şagirdlər əsərlərdəki qəhrəmanların hisslərini anlamağa çalışdıqca, real həyatda da digər insanların emosiyalarını daha yaxşı dərk etməyi öyrənirlər.”
Mütəxəssis qeyd edib ki, bu proses uşaqlarda sosial bacarıqların formalaşmasına da müsbət təsir göstərir: “Empatiya bacarığı inkişaf edən uşaqlar ünsiyyət zamanı daha anlayışlı olur, qarşı tərəfin hisslərini nəzərə almağı bacarır.”
Psixoloq əlavə edib ki, obrazlarla emosional bağ qurmaq uşağın daxili dünyasının zənginləşməsinə səbəb olur: “Şagirdlər müxtəlif həyat hekayələri ilə tanış olduqca, onların dünyagörüşü genişlənir və hadisələrə daha fərqli baxış bucağından yanaşmağı öyrənirlər.”
Onun sözlərinə görə, bu yanaşma uşaqların davranışlarına da təsir edir: “Ədəbiyyat vasitəsilə müsbət və mənfi davranış nümunələrini görən şagirdlər zamanla düzgün seçim etməyi və etik qərarlar verməyi daha yaxşı mənimsəyirlər.”
Sonda psixoloq vurğulayıb ki, ədəbiyyat dərslərində empatiyanın inkişafı uşağın şəxsiyyət kimi formalaşmasında mühüm rol oynayır: “Bu proses uşaqların həm emosional, həm də sosial cəhətdən daha sağlam və balanslı fərd kimi yetişməsinə kömək edir.”