Bu gün Azərbaycan opera sənətinin görkəmli nümayəndəsi, tanınmış müğənni və teatr xadimi Hüseynqulu Sarabskinin anadan olmasından 147 il ötür.
“Tehsil365” xəbər verir ki, 1879-cu il martın 20-də Bakıda anadan olan Hüseynqulu Sarabski (tam adı: Rzayev Hüseynqulu Məlik oğlu) Azərbaycan musiqi və teatr tarixində mühüm iz qoymuş sənətkarlardan biri kimi tanınır. O, lirik tenor səsi ilə milli opera səhnəsində parlaq obrazlar yaratmış, həmçinin aktyor, rejissor, pedaqoq və teatr təşkilatçısı kimi fəaliyyət göstərmişdir.
Hüseynqulu Sarabski 1908-ci ildən etibarən “Nicat” cəmiyyəti nəzdində yaradılan “Müsəlman Opera truppası”nın yaradıcılarından biri və aparıcı solistlərindən olmuşdur. O, Azərbaycan opera səhnəsində bir sıra məşhur obrazların ən uğurlu ifaçılarından sayılır. Sənətkar “Leyli və Məcnun” operasında Məcnun, “Şeyx Sənan” operasında Şeyx Sənan, “Əsli və Kərəm” operasında Kərəm, “O olmasın, bu olsun” musiqili komediyasında Sərvər, “Şah İsmayıl” operasında isə Şah İsmayıl rollarını böyük ustalıqla ifa etmişdir.
Sarabski Azərbaycan opera tarixində xüsusilə 1908-ci il yanvarın 25-də səhnəyə qoyulan “Leyli və Məcnun” operasında Məcnun rolunun ilk ifaçılarından biri kimi yadda qalmışdır. Bu tamaşa müsəlman Şərqində ilk opera kimi tarixə düşmüş və milli musiqi teatrının inkişafında mühüm mərhələ olmuşdur.
Azərbaycan mədəniyyətinin inkişafında göstərdiyi xidmətlərə görə Hüseynqulu Sarabskiyə 1932-ci ildə “Azərbaycanın xalq artisti” fəxri adı verilmişdir.
Görkəmli sənətkar 1945-ci il fevralın 16-da Bakıda vəfat etmişdir. Hüseynqulu Sarabski Azərbaycan professional musiqi teatrının banilərindən biri kimi milli mədəniyyət tarixində daim ehtiramla xatırlanır.