“Yeni dövrün çağırışlarına cavab vermək üçün təhsil müasir texnologiyalarla ayaqlaşmalıdır”.
Bu sözləri “Tehsil365”ə açıqlamasında təhsil eksperti Məzahir Məmmədli bildirib.
Məzahir Məmmədli qeyd edib ki, süni intellektin və rəqəmsal texnologiyaların sürətli inkişafı bütün sahələrə, o cümlədən təhsilə təsir edir. Onun sözlərinə görə, təhsil bu proseslərdən kənarda qala bilməz və müəllimlər yeni texnologiyalara uyğun hazırlıqlı olmalıdır.
“Hazırkı dövrdə müəllimlərin texnologiyaya adaptasiyası və şagirdlərlə rəqəmsal vasitələrdən effektiv istifadə bacarığı vacibdir. Yeni nəsil həm bilikli, həm də texnologiya ilə işləməyə hazırlıqlı olmalıdır. Bu, zamanla həllini tapacaq məsələdir, amma müasir təhsil üçün qaçılmazdır,” — deyə ekspert bildirib.
Məzahir Məmmədli əlavə edib ki, məqsəd yalnız texnologiyadan istifadə etmək deyil, həm də şagirdlərin təhsil prosesində yaradıcılıq və bilik bacarıqlarını inkişaf etdirməkdir. Beləliklə, müəllimlər və şagirdlər müasir dünyanın tələblərinə uyğun formalaşacaq.