“Özünə inamın aşağı olması şagirdlərin həm təhsilinə, həm də ümumi psixoloji inkişafına mənfi təsir göstərir”.
Bu sözləri “Tehsil365"ə açıqlamasında psixoloq Aysel Məmmədova bildirib.
Psixoloq qeyd edib ki, bəzi şagirdlər uğursuzluq qorxusu səbəbindən dərslərdə aktiv iştirak etmirlər və sual verməkdən çəkinirlər. Onun sözlərinə görə, bu hal zamanla onların potensialını tam şəkildə ortaya qoymasına mane olur.
“Şagird özünə inanmadıqda bildiyi mövzular üzrə belə fikrini ifadə etməkdən çəkinir. Bu isə həm dərs prosesində geridə qalmasına, həm də sosial bacarıqlarının zəifləməsinə səbəb olur,” — deyə Aysel Məmmədova vurğulayıb.
O əlavə edib ki, özünə inamın formalaşmasında ailə və məktəb mühitinin rolu böyükdür. Valideynlərin və müəllimlərin uşağa qarşı münasibəti onun özünü necə qiymətləndirməsinə birbaşa təsir edir.
“Uşaqları daim tənqid etmək və başqaları ilə müqayisə etmək onların özünə inamını daha da azaldır. Əksinə, onları dəstəkləmək və kiçik uğurlarını belə qiymətləndirmək vacibdir,” — deyə psixoloq qeyd edib.
Aysel Məmmədovanın sözlərinə görə, müəllimlər dərs zamanı şagirdlərə söz haqqı verməli, onların fikirlərini dinləməli və səhvlərə qarşı anlayışlı yanaşmalıdırlar. Bu, uşaqların özlərini daha rahat hiss etməsinə kömək edir.
“Dəstəkləyici və təhlükəsiz mühitdə böyüyən uşaqlar daha inamlı olur, öz fikirlərini sərbəst ifadə edir və dərslərdə daha uğurlu nəticələr göstərirlər,” — deyə o əlavə edib.
Psixoloq hesab edir ki, özünə inamın artırılması üçün şagirdlərə müstəqil qərar vermək imkanı yaradılmalı və onların fərdi xüsusiyyətləri nəzərə alınmalıdır.
“Uşaqlara güvənildiyini hiss etdirmək onların həm psixoloji sağlamlığını, həm də gələcək uğurlarını formalaşdırır,” — deyə Aysel Məmmədova bildirib.