Psixoloq Aytən Ələkbərova depressiya ilə adi pis əhvalın fərqlərindən danışıb. O bildirib ki, uzunmüddətli əhval dəyişiklikləri, səbəbsiz narahatlıq və fiziki simptomlar artıq depressiyanın göstəricisi ola bilər.
Psixoloq Aytən Ələkbərova “Tehsil365”ə açıqlamasında bildirib ki, depressiya ilə sadə əhval pozuntusunu fərqləndirmək üçün insanın vəziyyətini müəyyən müddət müşahidə etmək vacibdir:
“Depressiyada olan insanın vəziyyəti bir neçə günlə məhdudlaşmır. İnsan özündə günbəgün əhval dəyişikliklərini, halsızlığı və əvvəllər maraq göstərdiyi şeylərə qarşı maraqsızlığı hiss edir. Bu hal davamlı xarakter daşıyır.
Belə hallarda yuxu rejimi də pozulur. Bəzən insan gecələr yatmır, bəzən isə əksinə, həddindən artıq yuxulu olur. Elə vəziyyət yaranır ki, insan gecə ilə gündüzü ayırd edə bilmir, passiv və hərəkətsiz hala düşür.
Adi əhval pozuntusunda isə səbəb adətən bəlli olur. İnsan baş verən konkret bir hadisədən sonra əhvalının pisləşdiyini anlayır. Bu zaman o, niyə kədərləndiyini və ya ağladığını bilir.
Amma depressiyada bu fərqlidir. Bəzən insan nə üçün özünü pis hiss etdiyini izah edə bilmir. Ətrafdakılar bunu hər zaman düzgün anlamır və müxtəlif ehtimallar irəli sürürlər. Halbuki insanın yaşadığı vəziyyət daha dərin psixoloji proseslərlə bağlı olur.
Bəzi hallarda insanın özünə qarşı etdiyi, qəbul etmədiyi davranışlar və ya daxili konfliktlər də əhvalın pisləşməsinə səbəb olur. Bu vəziyyətin öhdəsindən gəlinmədikdə isə zamanla depressiyaya çevrilə bilər.
Digər tərəfdən, mövsümi depressiyalar da mövcuddur. Bu hallar çox vaxt xroniki yorğunluq nəticəsində yaranır. Bu zaman artıq yalnız psixoloji deyil, həm də bioloji dəyişikliklər özünü göstərir.
İştah pozğunluğu, ürəkbulanma, başgicəllənmə, səbəbli və ya səbəbsiz ağlama halları müşahidə olunur. Əsas fərq isə odur ki, insan bəzən niyə ağladığını belə anlamır.”