Onun sözlərinə görə, bu hal xüsusilə dərisi tündlüyə meyilli olan şəxslərdə daha qabarıq şəkildə özünü göstərir.
Həkim Adil Qeybulla “Tehsil365“ə açıqlamasında bildirib ki, gözaltı dərisinin qaralması bir çox səbəblərlə əlaqəli ola bilər.
“Üz dərisində dərialtı piy təbəqəsinin dəyişməsi, onun əriməsi nəticəsində piqmentasiyanın pozulması baş verir və bu, gözaltı qaralmaya səbəb olur,” – deyə Qeybulla vurğulayıb.
Ekspert qeyd edib ki, bəzi hallarda nefroloji problemlər, ödem, qaraciyər xəstəlikləri və uzunmüddətli metabolik pozuntular da bu vəziyyəti yarada bilər. “Orqanizmdə mübadilə pozulduqda zərərli maddələr çox toplanır və nəticədə üz dərisinin korlanması, gözaltı qaralmalar müşahidə olunur,” – deyə o əlavə edib.
Adil Qeybulla bildirib ki, üz dərisi daim günəş şüasına məruz qaldığı üçün qoruyucu vasitələrdən istifadə vacibdir. “Məsələn, rayon yerlərində gün altında işləyən, üzünə qulluq etməyən qadınlarda piqmentasiya daha tez itir və dəri qaralır. Ona görə də üz dərisinə daim qulluq lazımdır,” – deyə həkim vurğulayıb.
Onun sözlərinə görə, hazırda müxtəlif qoruyucu kremlər, vitalizasiya preparatları və digər dermatoloji vasitələr mövcuddur ki, bunlar üz dərisini qocalmaqdan qorumağa, piqmentasiyanı saxlamağa və üzü daha gənc tutmağa kömək edir. “Üz dərisini normal vəziyyətdə saxlamaq üçün mütəmadi qulluq vacibdir. Müasir tibbdə bunun üçün kifayət qədər imkanlar var,” – deyə Adil Qeybulla qeyd edib.