Məktəblərdə ədəbiyyat dərslərində bədii mətnlərlə işləmək şagirdlərin yalnız dil bacarıqlarını deyil, həm də düşünmə qabiliyyətini inkişaf etdirən əsas vasitələrdən biri hesab olunur. Mütəxəssislər bildirirlər ki, bu proses uşaqlarda analitik düşüncənin formalaşmasına mühüm təsir göstərir.
Mövzu ilə bağlı psixoloq “Tehsil365"ə açıqlama verib.
Psixoloqun sözlərinə görə, bədii mətnlərlə işləmək uşaqları düşünməyə və analiz etməyə təşviq edir: “Şagirdlər mətnləri oxuyarkən hadisələrin səbəb-nəticə əlaqəsini anlamağa çalışır, obrazların davranışlarını təhlil edir və müxtəlif baxış bucaqları formalaşdırırlar. Bu isə analitik düşüncənin inkişafına birbaşa təsir edir.”
Mütəxəssis qeyd edib ki, bədii əsərlər uşaqlarda sual vermə bacarığını da gücləndirir: “Mətnlərlə işləyən şagirdlər ‘niyə?’ və ‘necə?’ kimi suallar üzərində düşünməyə başlayır. Bu da onların məntiqi və tənqidi düşünmə qabiliyyətini inkişaf etdirir.”
Psixoloq əlavə edib ki, müzakirə və fikir mübadiləsi də vacib rol oynayır: “Əgər dərs zamanı şagirdlərə öz fikirlərini sərbəst ifadə etmək imkanı yaradılarsa, onlar həm analiz edir, həm də arqumentlərini əsaslandırmağı öyrənirlər.”
Onun sözlərinə görə, bu yanaşma yalnız akademik nəticələrə deyil, gündəlik həyata da təsir edir: “Analitik düşüncə bacarığı inkişaf edən uşaqlar qərar qəbul etmə, problem həll etmə və hadisələrə obyektiv yanaşma baxımından daha uğurlu olurlar.”
Sonda psixoloq vurğulayıb ki, bədii mətnlərlə işləmək düzgün metodlarla təşkil olunduqda uşaqların intellektual və psixoloji inkişafında mühüm rol oynayır.