Alimlər yüksək dozada D3 vitamininin COVID-19 infeksiyasının gedişatına təsirini araşdırıblar və nəticələr, yumşaq desək, gözlənilməz olub.
Tədqiqatda ABŞ və Monqolustandan COVID-19 testi müsbət çıxmış 1747 nəfər və onlarla birlikdə yaşayan 277 nəfər iştirak edib. İştirakçılar iki qrupa bölünüb: bir qrup 4 həftə ərzində gündəlik D3 vitamini qəbul edib, digər qrup isə plasebo alıb.
İlk iki gün ərzində iştirakçılara 9600 beynəlxalq vahid (BV), daha sonra isə gündəlik 3200 BV dəstək dozası verilib.
Kəskin mərhələyə təsir müşahidə olunmayıb
Dörd həftəlik müşahidə müddətində D vitamini qəbul edənlərlə plasebo qrupu arasında əhəmiyyətli fərq aşkar edilməyib. Həmçinin yüksək dozalar yoluxma riskini də azaltmayıb.
Uzunmüddətli COVID-19 üçün ümidverici nəticə
Bununla belə, tədqiqat uzunmüddətli COVID-19 ilə bağlı yeni nəticələr ortaya qoyub. D vitamini qəbul edən qrupda iştirakçıların 21%-i ən azı bir uzunmüddətli simptom barədə məlumat verib, plasebo qrupunda isə bu göstərici 25% olub.
Alimlər bu fərqi statistik baxımdan sərhəd səviyyədə əhəmiyyətli hesab edirlər və əlavə araşdırmalara ehtiyac olduğunu bildirirlər.
Daha ciddi şəkildə dozaya riayət edən iştirakçılar arasında isə daha müsbət nəticələr müşahidə olunub. Bu qrupda yoluxmadan 8 həftə sonra simptomların qalma ehtimalı daha aşağı olub.
Tədqiqatın müəlliflərindən Coann Menson bildirib ki, uzunmüddətli COVID-19 — yorğunluq, nəfəs darlığı və idrak problemləri kimi simptomlarla — bir çox insanın həyatına ciddi təsir göstərir. Onun sözlərinə görə, D vitamini kəskin mərhələyə təsir göstərməsə də, uzunmüddətli təsirlər baxımından perspektivli nəticələr göstərib və bu istiqamətdə daha geniş tədqiqatlar aparılmalıdır.
Qeyd olunur ki, böyüklər üçün gündəlik D vitamini norması 600 BV, 70 yaşdan yuxarı şəxslər üçün isə 800 BV təşkil edir.