Onun sözlərinə görə, müasir təhsil yanaşması göstərir ki, kitabxana şagirdin həm intellektual, həm də şəxsi inkişafında mühüm rol oynayan aktiv öyrənmə mühiti olmalıdır.
Təhsil eksperti Məzahir Məmmədli “Tehsil365“ə açıqlamasında bildirib ki, uzun illər boyu məktəb kitabxanaları yalnız kitabların saxlandığı məkan kimi qəbul edilib.
Ekspert qeyd edib ki, “kitabxanaların funksiyası yenidən düşünülməli və daha faydalı hala gətirilməlidir. İlk növbədə, kitabxana fondunun yenilənməsi vacibdir. Müasir dövrün tələblərinə uyğun olaraq şagirdlərin maraq dairəsinə uyğun bədii və elmi-populyar ədəbiyyatın artırılması onların oxuya marağını gücləndirir.”
Məmmədli əlavə edib ki, elektron resurslara çıxışın təmin olunması kitabxananın imkanlarını genişləndirir və şagirdlərə daha çevik informasiya əldə etmək imkanı yaradır. Onun sözlərinə görə, kitabxanaçıların rolu da xüsusi qeyd olunmalıdır: “Peşəkar və təşəbbüskar kitabxanaçı şagirdləri düzgün istiqamətləndirə, onların maraqlarına uyğun kitablar tövsiyə edə və oxu vərdişlərinin formalaşmasına dəstək ola bilər.”
Ekspertin fikrincə, məktəb kitabxanaları yalnız ənənəvi kitab saxlama yeri kimi deyil, həm də şagirdlərin müstəqil öyrənmə bacarıqlarını inkişaf etdirən, onların dünyagörüşünü genişləndirən və müasir təhsil prosesinə inteqrasiya olunan mərkəzlər kimi fəaliyyət göstərməlidir. “Əgər kitabxanalar bu funksiyanı yerinə yetirə bilsə, şagirdlərin təhsilə marağı artar və oxu mədəniyyəti daha güclü formalaşar,” – deyə Məzahir Məmmədli vurğulayıb.