Müasir dövrdə uşaqların gündəlik həyatı vizual və sürətli informasiya axını ilə əhatə olunub. Sosial şəbəkələr, qısa videolar və sürətli məzmun istehlakı onların düşüncə tərzinə də təsir göstərir.
Mövzu ilə bağlı psixoloq “Tehsil365"ə açıqlama verib.
Psixoloqun sözlərinə görə, sürətli informasiya axını uşaqlarda diqqətin səthi formalaşmasına səbəb ola bilər: “Uşaqlar qısa və tez dəyişən məlumatlara öyrəşdikcə, uzun müddət bir mövzu üzərində düşünməkdə çətinlik çəkə bilirlər.”
Mütəxəssis qeyd edib ki, bu vəziyyət dərin düşünmə bacarığına təsir göstərir: “Dərin analiz və təhlil tələb edən fəaliyyətlər, məsələn, kitab oxuma və ya uzun mətnlərlə işləmək uşaqlar üçün daha çətin görünə bilər.”
Psixoloq əlavə edib ki, balanslı yanaşma vacibdir: “Texnologiya tamamilə mənfi deyil, lakin onun istifadəsi nəzarətli və məqsədyönlü olmalıdır. Uşaqlarda həm vizual, həm də analitik düşüncə paralel inkişaf etdirilməlidir.”
Sonda mütəxəssis bildirib ki, valideynlər və müəllimlər uşaqları daha çox oxumağa və düşünməyə təşviq etməlidirlər.