Uşaqların yaradıcılıq fəaliyyətlərinə cəlb olunması onların psixoloji inkişafında mühüm rol oynayır. Xüsusilə şeir yazmaq və müxtəlif yazı fəaliyyətləri uşaqların daxili dünyasının formalaşmasına müsbət təsir göstərən əsas vasitələrdən biri hesab olunur.
Mövzu ilə bağlı psixoloq Nabat Mirzəyeva “Tehsil365"ə açıqlama verib.
Psixoloqun sözlərinə görə, şeir və yazı fəaliyyəti uşaqlarda özünüifadə bacarığını inkişaf etdirir: “Uşaqlar hiss və düşüncələrini sözlə ifadə etdikcə, daxili dünyalarını daha yaxşı anlamağa başlayırlar. Bu da onların emosional tarazlığını qorumağa kömək edir.”
Mütəxəssis qeyd edib ki, yaradıcılıq fəaliyyəti stressin azalmasına da təsir edir: “Yazı və şeir uşaqlar üçün bir növ emosional boşalma vasitəsidir. Bu o deməkdir ki, yazı və şeir ilə uşaqlarımı öz fikirlərini ifadə edə bilərlər. Onlar bu yolla daxili gərginliklərini ifadə edə və rahatlaşa bilirlər.”
Psixoloq əlavə edib ki, bu fəaliyyətlər düşüncə qabiliyyətini də gücləndirir: “Şeir və yazı uşaqlarda həm analitik, həm də yaradıcı düşüncənin inkişafına şərait yaradır. Onlar fikirlərini daha sistemli qurmağı və ifadə etməyi öyrənirlər.”
Onun sözlərinə görə, bu proses uşaqların özünə inamına da müsbət təsir göstərir: “Uşaqlar yazdıqları mətnlər vasitəsilə özlərini ifadə etdikcə və bu fəaliyyət qiymətləndirildikcə, onların özünə güvəni artır. Şeir və yazı ilə məşğul olan uşaqlarda anlama və empatiya hissləri daha da artır. Buda onlarda sosial münasibətlərdə daha sağlam ünsiyyət qurmağa kömək edir.”
Sonda psixoloq vurğulayıb ki, şeir və yazı ilə məşğul olmaq uşaqların həm emosional, həm də intellektual inkişafına kompleks şəkildə təsir edir və onların daha sağlam şəxsiyyət kimi formalaşmasına kömək edir.