Ümumiyyətlə, tədris proqramı əslində orta ümumtəhsil məktəblərində tamamilə dəyişilməlidir. Çünki hal-hazırkı tədris proqramı demək olar ki, müasir dövrün tələblərinə uyğun deyil və şagirdlərin nə ali təhsil müəssisələrinə qəbul olunması istiqamətində, nə də müasir dünyayla ayaqlaşması baxımından kifayət qədər fayda vermir.
Bu sözləri “Tehsil365” ə açıqlamasında , təhsil eksperti Ramin Nurəliyev bildirib.
“Mən hesab edirəm ki, ibtidai sinifdə olan tədris proqramı, orta tədris proqramı ümumi olaraq yüngülləşdirilməlidir. Məsələn, biz Finlandiya modelinə diqqət yetirsək, Finlandiya-da elə bir tədris proqramı həyata keçirilir ki, şagirdlərə demək olar ki, ev tapşırığı verilmir. Verilən tapşırıqlar isə gündəlik həyatla bağlıdır: yolda piyadə keçidindən keçərkən nəyə diqqət olunmalıdır, ailədə hansı hadisə baş verərkən reaksiya nə olmalıdır, valideynə hörmət, müəllimə sevgi necə göstərilməlidir. Bu şəkildə şagird öz intellektual səviyyəsini inkişaf etdirir və bütün əsas tapşırıqlar sinifdə həll olunur.”
“Əslində, kurikulum sistemində də belə olmalıdır. Təhsillə bağlı bütün məsələlər məktəbdə həll olunmalı, şagirdə daha yüngül tapşırıqlar verilməlidir. Lakin hal-hazırkı vəziyyətdə qəbul imtahanlarının çətinləşdirilməsi səbəbindən həm valideyn, həm müəllim şagirdə əlavə yük verir. Şagirdlər repetitor yanına gedir, hazırlıq kurslarına yazılır, əlavə vəsaitlər, test bankları istifadə olunur. Bu da istər-istəməz şagirdin yüklənməsinə səbəb olur. Hətta bu gün 7-ci sinif şagirdinin çantasını qaldırmaq belə çətinləşir.”
“Yuxarı siniflərdə vəziyyət daha da ağırdır. 10 və 11-ci sinif şagirdləri əsasən universitetə hazırlaşır, lakin məktəb proqramı qəbul imtahanlarına uyğun deyil. Məsələn, Azərbaycan dili fənnindən 11-ci sinifdə proqramın cəmi 5 faizi keçirilir. Riyaziyyatda isə bu göstərici 10-15 faiz təşkil edir. Qalan mövzular aşağı siniflərdə öyrədilir və şagirdlər 5-6 il əvvəl keçdikləri materialı yadda saxlaya bilmədikləri üçün yenidən əlavə dəstəyə ehtiyac duyurlar.”
“Bu səbəbdən valideyn də, müəllim də uşağın təməlini möhkəmləndirmək üçün onu əlavə hazırlığa yönləndirir. Çünki hamı bilir ki, yuxarı siniflərdə imtahanlar çətin olacaq. Nəticədə isə şagirdlər üzərində böyük bir yük yaranır.”
Ekspert bildirib ki, “bütün bunlara görə, ən böyük qlobal problemlərdən biri kimi yuxarı siniflərdə tədris proqramının dəyişdirilməsi mütləq vacibdir. Eyni zamanda qəbul imtahanlarının asanlaşdırılması da zəruridir. Yalnız bu halda şagirdlər həm daha effektiv öyrənə, həm də müasir dövrün tələblərinə uyğun inkişaf edə bilərlər.”