Təhsil proqramlarının əmək bazarının tələblərinə uyğun olmaması iqtisadiyyatda bir sıra ciddi problemlərə səbəb olur.
Liberal İqtisadçılar Mərkəzinin sədri Akif Nəsirli “Tehsil365”ə açıqlamasında bildirib ki, ən əsas problemlərdən biri işçi qüvvəsi ilə mövcud iş yerləri arasında uyğunsuzluğun yaranmasıdır. “Bu halda şirkətlər tələb olunan bacarıqlara malik işçi tapa bilmir. Eyni zamanda ali və ya peşə təhsili almış şəxslər işsiz qalır və ya ixtisasından kənar sahələrdə çalışmaq məcburiyyətində olur”, – deyə o qeyd edib.
İqtisadçı vurğulayıb ki, bu uyğunsuzluq əmək məhsuldarlığının azalmasına gətirib çıxarır. İşçilər öz bilik və bacarıqlarını tam tətbiq edə bilmədikdə, ümumi iqtisadi artım tempi də zəifləyir. Bundan əlavə, şirkətlər işçilərin yenidən hazırlanması üçün əlavə xərclərlə üzləşir ki, bu da onların rəqabət qabiliyyətinə mənfi təsir göstərir.
Akif Nəsirli əlavə edib ki, belə vəziyyət işsizlik səviyyəsinin artmasına və sosial problemlərin dərinləşməsinə səbəb olur. Xüsusilə gənclər arasında işsizliyin yüksəlməsi gəlir bərabərsizliyini artırır və yoxsulluq riskini gücləndirir. “Bu zaman dövlət sosial müdafiə xərclərini artırmalı olur ki, bu da büdcəyə əlavə yük yaradır”, – deyə o bildirib.
Ekspertin fikrincə, uzunmüddətli perspektivdə bu problem innovasiyanın zəifləməsinə gətirib çıxarır. Çünki əmək bazarının ehtiyac duyduğu ixtisaslı kadrlar yetişmir. Nəticədə ölkənin beynəlxalq rəqabət qabiliyyəti aşağı düşür və iqtisadi inkişaf tempi ləngiyir.